අප පිවිසුණේ අනුරපුර මහමෙව්නා උයනේ උඩ මළුව වෙතටයි. දෙවියන්ට පි‍්‍රය වූ තිස්ස නිරිඳුන් විසින් රාජ කිරීටයෙන් අභිෂේක කරවා ලක්දිව බුදු සසුනට පූජා කරමින් පුදසත්කාර කරනු ලැබුයේ ජය ශී‍්‍ර මහා බෝ සමිඳුන් ප‍්‍රදක්ෂිණා කොට වන්දනා කිරීමෙන් අනතුරුව බෝ සමිඳුන් අභියස අපි මඳ වේලාවක් විවේකයෙන් රැඳී සිටියෙමු.
පසෙකින් කණ වැකුණේ යාදිනි හඬකි. ඔහු ද අප මෙන් ම ලෙඩ වෙන, දිරන, වැනසෙන කයක් උරුම කරගෙන සිටියෙකි. නමුත් ඔහු පැතුවේ ‘‘ලෙඩ නො වේවා!” කියා ය. තෙරුවන් ගුණ කැටි කොට සැරසූ කොඩි වැලක්, ධජයක්, මනරම් කංචුකයන් වෙනුවට බෝධි ප‍්‍රාකාරය වටා වූයේ දරුවන්ගේ, වැඩිහිටියන්ගේ නම් සහිත ව ‘සියළු රෝග දුරු වේවා!’, ‘සියලූ කටයුතු සඵල වේවා!’ ආදී ලෙසින් සටහන් වූ කොඩි වැල් ය. එකී පැතුම් මා තුළ ද තිබිණි. වෙනසකට වූයේ එය සිදුකළ ආකාරය යි. නමුදු අවසන ඔහුගේ ද මාගේ ද පැතුම එක ම විය.
මම වෙනසට හේතුව විමසීමි. සැබැවින් ම කලණ මිතුරු ඇසුර සැබැවින් ම වාසනාවන්ත ය. ලෙඩ දුක් පිරි ජීවිතයක් ලබා සිටින්නවුන්ට ලෙඩ දුකින් අත්මිදෙන මඟ කියා දෙන්නේ සැබැවින් ම ඒ කලණ මිතුරාණෝ ය. පරම පූජනීය කල්‍යාණ මිත‍්‍රයන් වහන්සේ වූ ගෞතම බුදුරජාණන් වහන්සේගේ අසූ මහා ශ‍්‍රාවකයන් වහන්සේලා අතර අල්ප ආබාධ ඇති භික්ෂුන් වහන්සේලා අතුරින් අග‍්‍රස්ථානය හිමි වූයේ බක්කුල මහ රහතන් වහන්සේට ය.
අවුරුදු 160ක් පරමායුෂ වැළඳූ උන්වහන්සේට උණ සෙම්ප‍්‍රතිශ්‍යාවක් වත් ජීවිත කාලය පුරා වැළඳී තිබුණේ නැත. මේ කරුණ මෙසේ සිදු වූයේ යාතිකා කොට හෝ කොඩිවැල් හෝ ග‍්‍රහ වස්තූන්ට පුද පූජා දී නො වේ. උන්වහන්සේගේ පෙර ආත්මභවයක දී බුදුරජාණන් වහන්සේ සහ මහ රහතන් වහන්සේලා උදෙසා ඖෂධ පූජා කොට සිදු කළ දැහැමි ප‍්‍රාර්ථනාවක ප‍්‍රතිඵලයක් ලෙසට ලද ආනිසංසයකි.
එසේ නම් නිරෝගී බව කැමති අපි කුමක් කළ යුතු ද?
දෙතිසක් මංගල ලකුණින් යුතු වූ බුදු සමිඳුන් අද ජීවමානව අපට දැකගන්නට නො ලැබුණත් උන්වහන්සේගේ ශී‍්‍රමත් ධාතූන් වහන්සේලා ජීවමානව අදටත් වැඩ සිටිති. ජය ශී‍්‍ර මහා බෝධීන් වහන්සේ විරාජමානව වැඩ හිඳිමින් ලෝසතට සම්බුදු ගුණ සිහිපත් කරමින් සිත්සතන් සුවපත් කරවයි. ඉතින් නිරෝගී බව පතමින් ලියූ කොඩිවැල් හෝ යාදිනි වෙනුවට උතුම් ධාතූන් වහන්සේලාට, උතුම් සඟ රුවනට ඖෂධ පූජා කිරීමෙන් එහි ආනිසංසයන් අප ජීවිත තුළට ද කැඳවාගන්නට, කුසල් දහම් වඩන්නට එදා මෙන් ම අද ද අපට අවස්ථාව පවතී.
මේ උතුම් පුණ්‍ය කර්මය පිළිබඳ ව පින්වත් වෙද මහත්මයකු හා අප යෙදුනු පිළිසඳරක් ඇසුරින් සකස්කොට ගත් විශේෂ කරුණු කිහිපයක් මෙලෙස ඔබ හමුවේ දක්වන්නෙමු.
‘‘ඖෂධ සකස් කරන්නේ ගිලන් වුණ අයගේ සුවපත් භාවයටයි. ඉතින් ගිලානෝපස්ථානය කියන්නේ බුද්ධෝපස්ථානය හා සම කටයුත්තක් ලෙස තමයි බුදුරජාණන් වහනසේ දේශනා කළේ. ඒ කියන්නේ ගිලන් වූ කෙනෙකුට ඇප උපස්ථාන කරනවා කියන්නේ දස මරසෙන් පරදවා තුන්ලොව ජයගත් අපගේ බුදු සමිඳුන් හට ඇප උපස්ථාන කරනවා කියන එකයි. ගිරිමානන්ද සූත‍්‍ර දේශනාවේ මිනිසුන් හට වැළඳෙන රෝග පීඩාවන් ගැන උන්වහන්සේ කරුණාවෙන් දේශනා කළා. වා, පිත්, සෙම් කෝප වීම් නිසා තමයි බොහොමයක් රෝග වැළඳෙන්නේ. ඒ වගේ ම විෂමාකාර වූ අද සමාජයේ අනෙකුත් රෝගාබාධයන්ගේ වැඩිවීමක් මිසක් අඩුවක් නම් දක්නට ලැබෙන්නේ නැහැ.
ඖෂධ සූදානම් කිරීම උතුම් කටයුත්තක් නිසා අපි බොහෝම පිරිසිදුව, ගෞරවයෙන් යුතු ව තමයි මේ කටයුතු ඉටුකරන්න ඕනි. හැම ඖෂධයක් ම සකස් කරන්නට පෙර සිට ම ‘‘සියළු සත්වයෝ සුවපත් වෙත්වා!” කියන පින් සිතුවිල්ල මුදුන් පත් කරගන්න ඕනි. පූජා කිරීම සඳහා පාත‍්‍රයක් හෝ පිරිසිදු වට්ටියක් තෝරා ගැනීම සිදුකරන්න ඕනි. පාත‍්‍රය හොඳින් කහ වතුරින් හෝ සුවඳ පැනින් සෝදා පිරිසිදු කර තමන්ට රිසි සේ සරසා ගන්න පුළුවන්.
ඖෂධ ලබාගන්න කලින් ඉඳලා ගස් වැල්වලට අපි ගරු බුහුමන් කරන්න ඕනි. ඒ වගේ ම ඖෂධ ලබා ගන්න පෙර සිට ම ඖෂධ සකසා අවසන් වනතුරු ම බුදුගුණ සිහි කිරීම ගොඩක් වටිනවා.
ගස් වැල්වලින් හෝ වෙළඳපලින් අවශ්‍ය කරන ඖෂධ වර්ග ලබාගෙන පිරිසිදු වතුරින් සෝදා හොඳින් වියළා ගන්න. ඖෂධ තෝරා ගන්නේ විශේෂ වට්ටෝරුවකට අනුව නම් එම ඖෂධ එක වට්ටියකට හෝ පාත‍්‍රයකට එන අයුරින් සකසා ගන්න පුළුවන්. විශේෂ වට්ටෝරුවක් නැති නම් තමන්ට රිසි සේ පිළිවෙළකට අලංකාරවත් ලෙසින් අන් අයගේ සිත් පහදින අයුරින් සකස් කරගන්න. යම් යම් රෝගයන්ට ගැළපෙන ඖෂධ වට්ටෝරු වෙන වෙනම සකසා ගන්නත් පුළුවන්. ශාක කොටස් වගේ ම වෙළඳ පොළින් අවශ්‍ය බෙහෙත් තෙල් වර්ග, බාම් වර්ග, දියර වර්ග මේ ඖෂධ මංජුසාවට එකතු කරගන්න අපිට පුළුවන්. මේ වටිනා පින්කම තනිවම සූදානම් කරනවාට වඩා නිවසේ ලොකු කුඩා සෑම දෙනා ම එකතු වී බුදුගුණ සිහි කරමින් මේ කටයුතු කරනවා නම් එය බොහෝ ම වටිනවා. ඉතින් මේ අයුරින් තමයි බුද්ධෝපස්ථානයක් සඳහා අපි ඖෂධ මංජුසාව පිළියෙළ කරන්න ඕනි.
බුදු සමිඳුන් සිහිපත් කරමින් නිවසේ හරි, ධාතූන් වහන්සේලා වැඩ සිටින සෑ රජුන්ට හරි, පූජනීය ස්ථානයකට හරි, ගිලන් වෙලා සිටින පින්වත් ස්වාමීන් වහන්සේ නමකට හරි, උතුම් ජය ශ‍්‍රී මහා බෝධීන් වහන්සේ උදෙසා හරි සිත පහදවා ගෙන සකසා ගත්ත ඖෂධ මංජුසාව පූජා කිරීම කරගන්න පුළුවන්. මේ ඖෂධවල ගුණයෙන් සියලූ දෙනා සුවපත් වෙත්වා! සියලූ සත්වයෝ සුවසේ සිල් ගුණදම් පුරත්වා! කියන උදාරතර කරුණාවෙන් යුතු ව තමයි ඖෂධ පූජාවන් සිදු කරන්නට ඕනි.
වයසට යන ස්වභාවය ම, ලෙඩ වෙන ස්වභාවය ම උරුම කරගෙන සිටිනා අපට වටිනා ඖෂධ මංජුසාවක් සකසා උතුම් තෙරුවන් කෙරෙහි පහන් සිතින් පුද දෙන්නට හැකි ය. අපල දුරුවන්නට, රැකී රක්ෂා සරු කරන්නට බෝ මළුව වටා කොඩි වැල් එල්ලනවා වෙනුවට උතුම් තෙරුවන් ගුණ අර්ථවත් ව මෙවන් ඖෂධ පාත‍්‍රයක් පූජා කරගන්නට හැකි නම් එය කෙතරම් වටින්නේ ද? තෙරුවන් ගුණ සිත තුළ රඳවා ගනිමින් සැමදෙනා එකතු වී කරන මහඟු පින්කමෙන් නිවසේ සෑම දෙනාගේ ම සිත් සතන් සුවපත් කරගන්නට අප සැම දෙනාට මෙයින් අවස්ථාවක් උදා වේ. එලෙසින් ම එදවස බක්කුල මහ රහතන් වහන්සේ සිදු කළ උතුම් පුණ්‍ය කි‍්‍රයාවේ ආනිසංසයන් ලෙසින් උන්වහන්සේ උතුම් ජීවිතයක් උදාකර ගත්තා සේ ම අපට ද මෙම මහඟු පුණ්‍යකර්මයේ බලයෙන් උතුම් ජීවිතයක් කරා පිය නගන්නට වාසනාව උදා වේවි.
තවත් කුමට ද ලෙඩදුකින් අත් මිදෙන්නට යාතිකා පද වැල්…?
රෝග පීඩා බැහැර වේවා! සැමට සුවසෙත උදා වේවා!
අතදුන් සියළු දෙන හට පුණ්‍යානුමොදනා වේවා!
සියලූ සත්වයෝ සුවපත් වෙත්වා!
Recent Comments