Author: Mahamegha

01. එ් උත්තිය රජුගේ ඇවෑමෙන් ඔහුගේ කනිෂ්ට මලණුවන් වූ මහාසිව රජු සුදනන් ඇසුරු කරමින් දස වසරක් රාජ්‍යය කළේ ය. හෙතෙමේ භද්දසාල තෙරුන් වහන්සේ කෙරෙහි පැහැදී පෙරදිගින් නගරංගණ නම් වූ විහාරයක් කරවී ය. මහාසිව රජුගේ ඇවෑමෙන් ඔහුගේ මලණුවන් වූ සූරතිස්ස රජ තෙමේ පුණ්‍ය කටයුතු කෙරෙහි සාදර ගෞරවයෙන් දස වසරක් රජකම් කළේ ය.

එකල කොට්ටපබ්බත නම් විහාරයේ සීලයෙන් ව‍්‍රතයෙන් යුතු වූ, හැම කල්හි නොයෙක් නොයෙක් පින්කම් කරන්නා වූ සාමණේරයන් වහන්සේනමක් විසූහ. උන් වහන්සේ ආකාශ චෛත්‍යයේ මළුවට සුවසේ නැගෙනු පිණිස හිණිමං තුනක් හා ගල් ලෑලි ද තැබූහ. පැන් දන් දුන්හ. සංඝයා වහන්සේලාට වත් ද කළහ. සෑම කල්හි ම ක්ලාන්ත වූ කයකින් යුතු වූ උන් වහන්සේට මහත් ආබාධයක් වී ය.