මෙම භද්‍ර කල්පයෙහි බ්‍රාහ්මණ වංශයෙහි උපන් මහත් වූ යසස් ඇති, කතා කරන මිනිසුන්ට උතුම් වූ, අසූවක් අනුව්‍යංජනයන්ගෙන් යුතු, දෙතිස් මහා පුරිස ලකුණු ඇති, බ්‍යාමප්‍රභා ආලෝකයෙන් වටවූ රැස් දහරා ගැවසී ගත්, ගෝත්‍රයෙන් කාශ්‍යප නම් බුදුරජාණන් වහන්සේ ලොව පහළ වූ සේක.

ඒ බුදුරජාණන් වහන්සේ සඳ මඬල මෙන් අස්වැසිලි ඇති කරවන සේක. සූර්යයා මෙන් ආලෝකය පතුරුවන සේක. වැහි වලාවක් මෙන් කෙලෙස් දාහය නිවන සේක. සාගරය මෙන් ගුණ මැණික් ආකරයක් වන සේක. සීලයෙන් මහ පොළොව මෙනි. සමාධියෙන් හිමාල පර්වතය මෙනි. ප්‍රඥාවෙන් ආකාශය මෙනි. සුළඟ මෙන් කිසිවක නොඇලෙන සේක. පිරිස් හමුවෙහි විශාරද වූ, ඒ මහා වීර වූ බුදුරජාණන් වහන්සේ යම් දිනක මහ ජනයා සංසාර සාගරයෙන් ගොඩලමින් චතුරාර්ය සත්‍යය දෙසූ සේක.

එකල්හි මම බරණැස් නුවර මිගදාය නම් වූ මුව වනයේදී අමා පදය දෙසන, කෙලෙස් දුහුවිලි නොමැති, විහිදී යන මන පිනවන වචන ඇති, කුරවි කෙවිල්ලකගේ බඳු මිහිරි හඬ ඇති, හංසයෙකුගේ බඳු ඝෝෂා ඇති, මහ ජනයාට දහම් අවබෝධ කරවන්නා වූ බුදුරජාණන් වහන්සේ දුටුවෙමි. දේවාතිදේව වූ ඒ බුදුරදුන් දැක මිහිරි දහම් පද අසා අපමණ වූ භෝග සම්පත් හැර දමා අනගාරික පැවිදි බව ලැබුවෙමි. මෙසේ පැවිදි වූ මම නොබෝ කලකින්ම බහුශ්‍රැත වූ ධර්ම කථික වූ විසිතුරු ප්‍රතිභා ඇත්තෙක් වීමි. මම මහ පිරිස් මැද සතුටු සිතින් ගුණ වැනීමෙහි විශාරදව, ස්වර්ණ වර්ණ වූ බුදුරජුන්ගේ සම්බුදු ගුණ නැවත නැවත වර්ණනා කෙලෙමි.

නමදිමින් සම්බුදුරජාණන් – පවසමින් මුනි ගුණ අමාවන්…

බුදුරජාණන් වහන්සේ ආශ්‍රවයන් ක්‍ෂය කළසේක. උවදුරු රහිත සේක. දුරුකළ සැක ඇති සේක. සියලු කර්මයන් ක්‍ෂය කළසේක. අකුසල් නැති අරහත් මුනිඳාණන් වන සේක. ඒ භාග්‍යවත් බුදු සමිඳාණන් ලොවෙහි අනුත්තර සිංහ රජාණන් වන සේක. දෙව් මිනිසුන්හට සැපත සදාලන ධර්ම චක්‍රය ප්‍රවර්තනය කරන සේක. මහාර්ෂි වූ, දැමුණු සිතින් යුතු බුදු සමිඳාණන් පුරිසදම්ම සාරථි වන සේක. ශාන්ත සිත් ඇති ඉසිවරයාණන් හැම සිත් සනසන සේක. තමන් වහන්සේ කෙලෙස් ගිනි නිවා අන් අයව ද නිවාලන්නේය. තමන් වහන්සේ අස්වැසුනේ, අන් අයට ද අස්වැසිලි ඇති කරන්නේය.

ඒ බුදුරජාණන් වහන්සේ ශූර ය, වීර ය, නැණවත් ය, පැණවත් ය, කාරුණික ය, දිනූ කෙලෙස් ඇත්තේ නිහතමානී වන සේක. දිනන සුලු ය. ආශා නැති සේක. තෘෂ්ණා නැති හෙයින් අනේජ වන සේක. නිශ්චල ය, නුවණැති ය, මෝහය නැත්තේ ය, සමාන කෙනෙක් නැති හෙයින් අසම ය, වගකීම් උසුලන සේක. උත්තම බැවින් වෘෂභ වන සේක. පව් නැති බැවින් නාග වන සේක. ශ්‍රේෂ්ඨ බැවින් සිංහ වන සේක.

ආචාර්යවරුන් අතරෙහිදු දක්ෂ වන සේක. රාගය නැත්තේ ය. නිමල ගුණ ඇති සේක. වාදීන් අතුරෙන් ශූර ය. පව් දුරු කළ සේක. සිතෙහි රාගාදී කිළුටු නැති නිසා අඛිල වන සේක. පහ වූ රාගාදි හුල් ඇති හෙයින් විසල්ල වන සේක. ඉන්ද්‍රියයන් සංවර කළ බැවින් සන්සුන් ය. පිරිසිදු ය. පව් බැහැර කළ හෙයින් බ්‍රාහ්මණ වන සේක. සංසිඳවූ පව් ඇති බැවින් ශ්‍රමණ වන සේක. අනාථයන්ට පිහිට වන බැවින් නාථ වන සේක. කෙලෙස් ව්‍යාධියට වෛද්‍යවරයාණෝ ය. රාගාදී කෙලෙස් හුල් උදුරන ශල්‍ය වෛද්‍යවරයාණෝ ය. කෙලෙස් සතුරන් ජයගත් යෝධයාණෝ ය. බුදුවරයාණෝ ය. පතළ ගුණ ඇති සේක. දමනය කළ යුත්තන් දමනය කරන බැවින් සාරථි වන සේක. ලොවේ යහපත දැක සතුටු වන මුදිතාවෙන් යුතු වන සේක.

නිර්වාණ ස්වර්ණ ද්වාරයෙන් පිවිසූ තිලෝ සතුන්
සම්බුද්ධ රාජ පාද පද්ම වන්දනා කරම්

තෘප්තිමත් ය. මහාකරුණාදී ගුණ ඇති සේක. කෙලෙස් සතුරන් නැසූ සේක. ශාන්තිය උදාකරන සේක. නිවන් මගට පමුණුවන සේක. අමා දහම් දෙසන සේක. ශ්‍රාවකයන් සතුටු කරවන සේක. සංසාර චක්‍රයේ අර සිඳලූ සේක. කෙලෙස් බැඳුම් සිඳින සේක. හික්මවිය යුතු අයගේ කථාවන් කොපමණ දුර සිටියත් අසන සේක. මනා පිළිවෙත් ඇති අයට පසසන සේක. උවදුරු රහිත ය. සැක රහිත ය. තෘෂ්ණා විරහිත ය. කෙලෙස් රජස් රහිත ය. ඉවසන සේක. නිවන් මගෙහි වඩින සේක. මග නොමග මේ යැයි පෙන්වා දෙන සේක. යහපත අයහපත පවසන සේක. සත්වයන් සසරින් එතෙර කරවන සේක. අභිවෘද්ධිය ඇති කරවන සේක. යහපත සිදුකරන සේක. කෙලෙස් නමැති ගල්කුළු පලා දමන සේක. සත්වයන් නිවනට පමුණුවන සේක. දුටුවන් සිත් ගන්නේය. කෙලෙස් සතුරන් නසන සේක. මහා වීර්යය ඇති සේක. තපෝ ගුණයෙන් යුතුවන සේක.

සතුරු – මිතුරු – මැදහත් සියලු සත්වයන් කෙරෙහි සම සිත් ඇති සේක. අසම වූ බුදුවරුනට පමණක් සමාන බැවින් අසමසම වන සේක. කිසිවෙකුගේ පිහිටක් නොමැතිව බුද්ධත්වය ලැබූ හෙයින් අසහාය වන සේක. දයා ගුණයට නිවාසස්ථාන වන සේක. ආශ්චර්ය වන සේක. කුහක නොවන සේක. සර්වඥතා ඤාණය පිණිස සියල්ල සැපිරූ සේක. (ඵුස්ස බුදුන්ගේ පටන්) සත්බුදුවරුන් අතරේ සත්වැනි මහා ඍෂි වූ හෙයින් ඉසි සත්තම වන සේක. දුරු කළ සැක ඇති සේක. මාන නැත්තේ ය. පමණ කළ නොහැකි අප්‍රමාණ ගුණ ඇත්තේ ය. උපමාවලින් වර්ණනා කොට අවසන් කළ නොහැකිය. වර්ණනා විෂය ඉක්මවූ සේක. චතුරාර්ය සත්‍ය ධර්මයේ හා දතයුතු සියලු ධර්මයන්හි පරතෙරට වැඩි සේක. මාර යුද්ධය ජය ගත් සේක.

වැණුවා නම් බුදු ගුණ වැණුවා ම ය….

සියලු සත්වයන් අතුරෙහි උතුම් ම හරය වූ බුදුරජාණන් වහන්සේ කෙරෙහි ප්‍රසාදය අමා සුව උදා කරයි. එම නිසා බුද්ධ රත්නය කෙරෙහි ද ධර්ම රත්නය කෙරෙහි ද සංඝ රත්නය කෙරෙහි ද ඇති කරගත් ශ්‍රද්ධාව මහත් වූ ආනිසංස ඇති කරන්නේය. මම මේ ආදී ගුණවලින් තුන්ලොවට උතුම් පිළිසරණ වූ බුදුරජාණන් වහන්සේ වර්ණනා කරමින් පිරිස් මැද ධර්ම කථාවක් කෙළෙමි.

මම අපවත් වී තුසිත දෙව්ලොව ඉපිද මහත් දිව්‍ය සැප විඳ මිනිසත් බවේ ඉපිද සුවඳවත් වූයෙමි. බුදුගුණ වර්ණනා කිරීමෙහි ඒ සියලු ආනිසංස අතිශය විස්මයජනක ය. එය වර්ණනා කරන්නෙමි. සියල්ලෝ ම එකඟ සිත් ඇතිව මාගේ වචනය අසත්වා! ජනයා එකතු වෙන තැන්වලදී පැහැදුන සිතින් සම්බුදු ගුණ වයා මිහිරි හඬ ඇත්තෙක් වීමි. හැම තැනදී ම සැප ඇත්තෙක් වෙමි. යශස් ඇත්තෙක්, සුව ඇත්තෙක් වූයෙමි. බුදු බැතිය ඇති අයට නිවන පහසුවෙන් ලැබෙන්නේ වේ. ඔවුන්ගේ නිර්වාණ සම්පත්තියට හේතුව කියමි. එය තත් වූ පරිදි අසන්න.

මම භාග්‍යවතුන් වහන්සේගේ ශාන්ත වූ යසසට අභිවාදනය (ගෞරවයෙන් නමස්කාර කිරීම) හේතුවෙන් යම් තැනක උපන්නෙම් ද, යසස් ඇත්තෙක් වීමි. දුක් කෙළවර කරන්නා වූ බුදු රජුන් ද, ශාන්ත වූ අසංඛත ධර්මය ද වර්ණනා කරමින් අන් අයට ද සැපය උදාකර දී ඒ හේතුවෙන් මනා සැප ඇත්තෙක් වීමි. බුද්ධාලම්බන ප්‍රීතියෙන් යුක්තව බුදුරජුන්ගේ ගුණ කියා මාගේ සිතෙහි ද අන් අයගේ සිතෙහි ද කැමැත්ත (ශ්‍රද්ධාව) ඇති කෙළෙමි. ඒ හේතුවෙන් අන් අයගේ සිත් අලවන ගති ඇති කෙනෙක් වීමි. තීර්ථකයන් විසින් ගැවසී ගත් ජන සමූහයා කෙරෙහි මිත්‍යා තීර්ථකයන් මැඩ පවත්වා ගුණ කියමින් බුදුරජුන් බැබළවීමි. ඒ පිනෙන් පැහැපත් කෙනෙක් වීමි. මම සම්බුදු රජුන්ගේ ගුණ කියා ඒ හේතුවෙන් සරා සඳ මෙන් ජනයා හට ප්‍රිය දැකුම් ඇත්තෙක් වීමි. මම ශක්ති පමණින් බුදු රජුන්හට සියලු වචනයෙන් ස්තූති ප්‍රශංසා කෙළෙමි. ඒ හේතුවෙන් වාගීශ්වර වීමි. විසිතුරු වූ වැටහෙන නුවණ ඇතියෙම් ද වෙමි. මම සම්බුදු ගුණ වර්ණනා කරමින් අන් අයගේ කෙලෙස් දුරු කෙළෙමි. එම කර්මයේ බලයෙන් නිකෙලෙස් සිත් ඇත්තෙක් වීමි.

විමතියට පත් යම් බාල කෙනෙක් මහා මුනි වූ බුදුරජාණන් වහන්සේට පරිභව කෙරෙත් නම්, ඔවුනට කරුණු සහිතව නිග්‍රහ කෙළෙමි. ඒ හේතුවෙන් මම පරිභව නොලද්දෙම් වෙමි. බුදු ගුණ සිහිකොට දේශනා කරමින් අසන්නන්ට නුවණ ඉපිදවීමි. එහෙයින් මම ප්‍රඥාවන්ත වූයෙමි. සියුම් වූ අරුත් දකින්නෙක් වීමි. සියලු ආශ්‍රවයන් ක්‍ෂය කරන ලදුයෙම්, තරණය කරන ලද සසර සයුරු ඇත්තෙමි. දර නොමැති (උපාදාන රහිත) ගින්නක් මෙන් පිරිනිවනට යන්නෙමි. මම බුදු රජුන්හට යම් ස්තූති ප්‍රශංසාවක් කෙළෙම් ද, එම පිනෙන් දුගතියක් නොදනිමි. සම්බුදු ගුණ වැනීමෙහි විපාක එලෙසිනි.

මා විසින් ක්ලේෂයෝ දවන ලදහ. සියලු භව නසන ලදහ. ඇත් රජෙකු මෙන් බැඳුම් සිඳ ආශ්‍රව රහිතව වෙසෙමි. බුදුරජාණන් වහන්සේ වෙත මාගේ පැමිණීම ඒකාන්තයෙන් ම යහපත් විය. ත්‍රිවිද්‍යාවත් ලබන ලදී. බුදුරජාණන් වහන්සේගේ අනුශාසනාව කරන ලදී.

මහමෙව්නාව අසපුවාසී පින්වත් ස්වාමීන් වහන්සේ නමක් විසිනි