විශ්වාසදායක ලෙස ලේසියෙන්ම ගෙදරදීම අපට සදා ගතහැකි බටර් කුකීස් හදන විදිහ ගැන මේ ලිපියෙන් ඔබව දැනුවත් කිරීමට අපි උත්සහ කරන්නෙමු. මේ සඳහා විස්තර සපයා දුන් ප්‍රජාපති විජේසිංහ මහත්මියද මෙත් සිතින් පුණ්‍යානුමෝදනාපූර්වකව මතක් කර සිටිමි.

අවශ්‍ය ද්‍රව්‍ය:

බටර් ග්‍රෑම් 140 ක්
ලුණු තේ හැඳි ½
සිනි කෝප්ප ½
වැනිලා තේ හැඳි ½
පාන් පිටි ග්‍රෑම් 180 ක්

1. පළමුව මේ සඳහා අවශ්‍ය සීනි කෝප්ප 1/2 ය ග්රයින්ඩරයකට දමා පිටි වන තුරු අඹරා ගන්න. දැන් එය පසෙකින් තබා ගන්න. අපට අවශ්‍ය කරන 140g පමණ බටර් ප්‍රමාණය තරාදියකින් මැන ගන්න. කාමර උෂ්ණත්වයේ ප්‍රමාණයට බටර් වල සිසිලස අඩු වී තිබිය යුතුය. ඉක්මනින් ක්‍රීම් ගතියට ගැනීම සඳහා මෙය වඩාත් උපකාරී වේ. ගැඹුරු වැඩි භාජනයකට බටර් ටික දමා ගෙන Beater එකක් හෝ Hand beater එකක් ආධාරයෙන් හොඳට cream ගතිය එනතුරු beat කර ගන්න. මේ අතර වාරයේදී ලුණු තේ හැඳි ½ හෝ මදක් අඩුවෙන් මේ බටර් මිශ්‍රණයට එකතු කර ගන්න.

2. මෙසේ මිශ්‍ර කරන අතර වාරයේදී කලින් පවුඩර් කරගත් සීනි කෝප්ප ½ ද ටික ටික මිශ්‍ර කරන්න. Beater එක ආධාරයෙන් හොඳින් මිශ්‍ර කරන්න. දැන් වැනිලා තේ හැඳි ½ ද මෙම මිශ්‍රණයට එකතු කරමින් මිශ්‍ර කරන්න.

3. අවසාන පියවර වශයෙන් පිටි 180g ප්‍රමාණය මෙම මිශ්‍රණයට එකතු කළයුතු වේ. Beater එකේ වේගය අඩුකර සෙමෙන් සෙමෙන් බටර් මිශ්‍රණයට පාන් පිටි ටික එකතු කර ගත යුතු වේ. සම්පුර්ණයෙන්ම පිටි ටික මිශ්‍ර කිරීමෙන් පසු Beater එකෙන් හොඳට මිශ්‍ර කර ගන්න. මේ සඳහා අඩු වේගයක් භාවිතා කරන්න.

4. ඉන්පසු පිරිසිදු මතුපිටක් ඇති ලෑල්ලක් ගෙන එය මතට පාන් පිටි ටිකක් ඉස ගන්න. දැන් එම ලෑල්ල මතට සාදා ගත් මිශ්‍රණය දමා ගන්න. රොටි අනන ආකාරයට හොඳට පදම් කරමින් අනාගන්න. මිශ්‍රණය හොදට ඝන ස්වභාවයට පැමිණි පසු පසෙකින් තබා ගන්න.

පොලිතින් එකකට හෝ ලන්ච් ෂීට් එකකට පිටි ටිකක් ඉසගන්න. දැන් අප සාදා ගත් සම්පුර්ණ මිශ්‍රණය එයට දමා ඍජුකෝණාශ්‍ර හැඩයට නැතිනම් අප කඩෙන් මිලදී ගන්නා බටර් කැබලි වල හැඩයට සමාන්තරව සකසා ගන්න. මෙහිදී පොලිතින් එක භාවිතා කර මිශ්‍රණය අතේ තවරාගන්නේ නැතිව එම හැඩය සකසා ගැනීමට භාවිතා කරයි.

දැන් එම පොලිතීන් ආවරණයෙන්ම ඍජුකෝණාශ්‍ර හැඩැති මිශ්‍රණය ඔතා ගන්න. මෙහිදී මෙම හැඩය කුකීස් සෑදීමට අවශ්‍ය හැඩය කපා ගැනීමට පහසු කරවයි. දැන් එය ශීතකරණයේ තබන්න. මිශ්‍රණය හොදින් ඝන වනතුරු ශීතකරණයේ තැබිය යුතුවේ. සාමාන්‍යයෙන් පැය 5ක 6ක පමණ කාලයකින් එය ඝන වී යයි.

5. මෙසේ තද ගතිය යුතු මිශ්‍රණය ශිතකරණයෙන් ඉවතට ගෙන පොලිතින් ආවරණය ඉවත් කර ගත යුතු වේ. මෙහිදී හොඳින් කැපෙන පිහියක් භාවිතා කරන්න. අප ගත් මිශ්‍රණයේ ප්‍රමාණයට කුකීස් 12ක් පමණ කපාගත හැකිවේ.

6. ඔබගේ oven එක විනාඩි 5ක් පමණ 180°C ක් පමණ රත්කරගෙන තිබිය යුතු වේ. කේක් තැටියක් ගෙන එයට බටර් පොඩ්ඩක් ගාගන්න. දැන් එම බටර් මතට පාන්පිටි ටිකක් ඉසගන්න. මෙසේ සකසා ගත් තැටිය මතට කපාගත් කුකීස් ටික අතුරා ගන්න. මඳක් එකිනෙක අතර ඉඩ පවතින ආකාරයට අතුරා ගතයුතු වේ. ටූත් පික් එකක් ගෙන එම කුකීස් එකින් එක මදක් සිදුරු කර ගන්න. එක කුකීස් එකක් මත සිදුරු 8 හෝ 10 එන පරිදි සමාන්තරව විදගන්න. මෙය කුකීස් bake වෙන විට පිපීමට උදව් වේ.

මෙසේ සාදා ගත් කුකීස් oven එකට දමා 170°C ක පමණ උෂ්ණත්වයක විනාඩි 10ක් පමණ bake කරගන්න. ඔබට ඉක්මනින්ම රසවත් කුකීස් එකක රස විඳිය හැක. බෝතලයක දමා තබා ගැනීමටද පුළුවනි.

හවස තේ බොන වේලාවට පවුලේ අය සමඟ හෝ අමුත්තන් පැමිණි විට සංග්‍රහ කිරීමට ඔබටම සකසා ගත හැකි ඉතා කදිම රසවත් කුකීස් එකකි. ඉඩ ලැබුණු අවස්ථාවක සංඝයාටද පූජා කොට පින් රැස් කර ගන්න.

“දත්වා ච භුත්වා ච යථානුභාවං
අනින්දිතෝ සග්ගමුපේති ඨානං”

“තමාගේ ශක්ති පරිදි ප්‍රණීත දන් දී, ප්‍රණීත ආහාර තමාත් අනුභව කොට නින්දා රහිත සුගතියෙහි උපදී”

“මනාපදායී ලභතේ මනාපං”

“මනාප දේ දෙන්නා මනාප දේ ලබයි” යනු බුදු වදන් ය. ඒ අනුව බලන විට ආහාරයට ගැරහීම නුසුදුසු ය.

ඔබට ජය ශ්‍රී. සුභ දවසක්!

ඔබේ හිතාදර

අෂාන් ඉමල්ක.

සෞඛ්‍ය ආරක්ෂිතභාවය පිළිබඳ තැකීමක් නොමැතිව බාහිර අවන්හල් තුළ ආහාර ගැනීම බොහෝ දෙනෙක් ප්‍රිය කරන දෙයකි. ඒ ඒ තැන්වල තිබෙන ආකර්ෂණීය රටාව, කෑම වර්ග ආදිය නිසා බොහෝ දෙනා ඒ වෙත ඇදෙයි. එනමුත් ඇතිවී තිබෙන ව්‍යසන තත්ත්වය නිසා අවන්හල් ආදිය විවෘතව නොපවතින බැවින් බොහෝ දෙනෙකුට ආශාව ඇතත් නිවසට වී සිටින්න සිදුවී ඇත.

ලොකු කුඩා කවුරුත් පාහේ ප්‍රිය කරන කෑමක් තමයි ‘අල චිප්ස්’ කියන්නේ. ආකර්ෂණීය පෙනුම හා එහි ඇති cryspy ගතියට බොහෝ දෙනා ඇලුම් කරති. අල චිප්ස් ලේසි ක්‍රමයකට කඩේ විදිහට ගෙදරදී හදාගන්න ආකාරය අපි බලමු.

අවශ්‍ය ද්‍රව්‍ය:
අල ගෙඩි කිහිපයක් (දිගටි ස්වභාවයෙන් යුතු වේ නම් වඩාත් ගැලපේ.)
පාන් පිටි හෝ corn flour ටිකක්
බඩ ඉරිඟු පිටි
ලුණු
පොල්තෙල්

මුලින් ම අප කළ යුත්තේ අල ගෙඩි ටික සුද්ද කරගැනීමයි. මෙහිදී ඔබට අවශ්‍ය පමණට අල ගෙඩි ගන්න. ඒවායේ පොතු අරිමින් වතුර පිරවූ භාජනයකට දමාගන්න. නැත්නම් අලවල කහට පිපේ.

සාමාන්‍ය අල චිප්ස් දිගටි ස්වභාවයක් ගනී. ඒ නිසා දිග හැඩැති අල දිග අතට තීරු කපාගන්න. මේ සඳහා හොඳින් කැපෙන පිහියකින් කපාගන්නේ නම් වඩාත් උචිත වේ. දිග අතට කපාගත් අල තීරු පෙති ටිකක් වතුර භාජනයකට දමාගන්න.

මෙසේ කපාගත් සියලුම අල තීරු ටික පිරිසිදු ජලයෙන් සෝදා සියලුම වතුර ටික පෙරාගන්න. පිරිසිදු තුවායක් මතට හෝ කපු රෙදි කැබැල්ලක් මතට අල තීරු ටික දමාගෙන තව දුරටත් වතුර ටික වියළා ගන්න. මෙසේ ටික වෙලාවක් වියළාගත් අල තීරු ටික වියළි භාජනයකට දමාගන්න.

ගැළපෙන තාච්චියක් ගෙන ලිප මත තබා ගින්දර දල්වන්න. අල තීරු බැද ගැනීමට අවශ්‍ය ප්‍රමාණයට පොල් තෙල් දමාගන්න. මෙහිදී ගැඹුරු තෙලේ බැද ගැනීමට අවශ්‍ය ප්‍රමාණයට පොල් තෙල් අවශ්‍ය වේ. තෙල් ටික හොඳින් රත්වූ පසුවත් ගින්දර අඩු නොකොට වැඩි ගින්දරේ.ම තෙල් ටික රත් වෙන්න ඉඩ හරින්න.

මෙහිදී අපි අල තීරු අමුවෙන් දමන නිසා ඒවා cryspy වීමට වැඩි උෂ්ණත්වයක් අවශ්‍ය වේ. ඒ නිසා ගින්දර වැඩිපුර දමන්න.

එක් වරකට බැද ගත හැකි ප්‍රමාණයට අල තීරු ගන්න. එය වෙනත් වියළි භාජනයක දමාගන්න. ඒ මතට පාන් පිටි හෝ බඩ ඉරිඟු පිටි හොඳින් ඉසින්න. සෑම අල තීරුවක.ම තැවරෙන සේ පිටි ටික ඉසගන්න.

දැන් තෙල් හැන්දක් ගෙන, රත්වූ තෙලට සකසා ගත් අල තීරු ටික පරිස්සමින් දමාගන්න.

මෙහිදී බුබුළු දමමින් අල තීරු ටික හොඳින් බැදේ. කිසි විටෙකත් ගින්දර අඩු කිරීමට අවශ්‍ය නොවේ. රන්වන් පාටට හොඳ cryspy ගතිය එනතුරු අල තීරු ටික බැද ගන්න. විටින් විට පෙරලන විට අලවල cryspy ස්වභාවය තෙල් හැන්දට දැනේවි. බුබුළු දමන ගතිය අඩුවෙමින් රන්වන් පැහැය එන විට අල තීරු ටික ලිපෙන් බාගත යුතුය.

පත්තර කොළයක් දැමූ භාජනයකට බැදගත් අල තීරු ටික දමාගන්න. වැඩිපුර ඇති තෙල් ටික පත්තර කොළයට උරාගනීවි. මෙසේ සකසා ගත් අල තීරුවල රස්නය ඉවත්වීමට පෙර ලුණු කුඩු ටිකක් ඉසගන්න. ඔබේ රස පදමට ලුණු දමා උණු උණුවේ ම ඔබගේ පවුලේ අය සමග රස බෙදා ගන්න. cryspy ගතිය නිසා කන්න කන්න ආසා හිතේවි. කපා ගත් සියලුම අල තීරු ටික පෙර පරිදි.ම පිටි ඉස ගනිමින් බැදගන්න.

දැන් ඔබට කඩේ විදිහට ම රසවත් cryspy අල චිප්ස්වල රස විඳිය හැක. ඉඩ ලැබුණ අවස්ථාවක සංඝයාට ද පූජා කොට පින් රැස් කර ගන්න.

“දත්වා ච භුත්වා ච යථානුභාවං
අනින්දිතෝ සග්ගමුපේති ඨානං”

“තමාගේ ශක්ති පරිදි ප්‍රණීත දන් දී, ප්‍රණීත ආහාර තමාත් අනුභව කොට නින්දා රහිත සුගතියෙහි උපදී”

“මනාපදායී ලභතේ මනාපං”

“මනාප දේ දෙන්නා මනාප දේ ලබයි” යනු බුදු වදන් ය. ඒ අනුව බලන විට ආහාරයට ගැරහීම නුසුදුසු ය.

ඔබට ජය ශ්‍රී. සුභ දවසක්!
ඔබේ හිතාදර

අශාන් ඉමල්ක.

මේ රොටි සෑදීම සඳහා පොල් අවශ්‍ය නොවේ. ජලය හා ලුණු පමණක් අවශ්‍ය පදමට දමා සකසා ගත හැකිය. සාමාන්‍යයෙන් පිටි කෝප්පයකින් (250g පමණ) රොටි 6ක් පමණ සෑදිය හැක. චපාති රොටියේ ඇති මෘදුභාවය නිසා අපහසුවකින් තොරව කෑමට ගත හැක. බත්වලට ආදේශකයක් ලෙස ඕනෑම ව්‍යංජනයක් සමඟ රස විඳිය හැක. චපාති සෑදීමේදී සැලකිලිමත් වියයුතු කාරණා කිහිපයක් තිබේ. ඒ ගැන මේ ලිපියෙන් ඔබව දැනුවත් කිරීමට අප බලාපොරොත්තු වේ.

———

පිටි කෝප්පයක ප්‍රමාණයේ පිටි අනාගැනීමේදී සැලකිලිමත් විය යුතු කරුණු.

අවශ්‍ය පරිදි පිටි ටික ගෙන භාජනයකට දමාගෙන ලුණු තේ හැඳි ¼ පමණ දමන්න. එය හොඳින් මිශ්‍ර කරන අතරතුර ඇල් වතුර කෙමෙන් කෙමෙන් එක් කරන්න. මේ සඳහා වතුර කෝප්ප ½ ත් ¾ අතර ප්‍රමාණයක් සෑහේ. හොඳින් මිශ්‍ර කරමින් යන්තම් පිටි මෝලිය අතේ ඇලවෙන ප්‍රමාණයට වතුර එක්වී තිබිය යුතුය. එම ප්‍රමාණයට වඩා අඩු වුනොත් චපාතිය තද බවකින් යුක්ත වේ. වතුර වැඩි වුවහොත් රොටිය තුනී කර ගැනීමට අපහසු වේ.

එම ප්‍රමාණයට මෝලිය සාදාගත් පසු විනාඩි කිහිපයක් අත බරකොට මඩිමින් හොඳින් පදම් කරගත යුතුය. මෙහිදී අතේ ඇලවෙන ස්වභාවය අඩුවී පිටි මිශ්‍රණය හොඳින් මෙලෙක් වන බව අතට දැනේ. ඉන්පසු පිටි මිශ්‍ර කිරීමට ගත් භාජනයේ ම පිටි මෝලිය ගුලියක් සේ සකසා තෙත රෙදි කැබැල්ලකින් විනාඩි කිහිපයක් වසා තබන්න. මෙම පියවර කිරීම අත්‍යවශ්‍ය නොවුනත් ඔබේ චපාතියේ මෘදුභාවය ඇති වීමට එය උපකාරී වේ.

මීළඟට අප කළයුත්තේ පිටි මෝලිය කුඩා පිටි ගුලිවලට කඩා ගැනීමය. සාමාන්‍යයෙන් දෙහි ගෙඩියක ප්‍රමාණයේ පිටි ගුලි සාදා ගැනීම වඩාත් උචිත වේ. අප ගන්න පිටි ප්‍රමාණයට මෙවැනි ගුලි 6ක් පමණ සාදාගත හැක. මෙසේ සාදාගත් පිටි ගුලි ටික අතට ගෙන අල්ලෙන් මඳ තෙරපුමක් යොදා පැතලි කර ගන්න. ඒ රොටිය වඩන විට පිටි ටික සමානව බෙදී යාම පහසු කර ගැනීම සඳහාය.

දැන් තව ආටා පිටි ස්වල්පයක් ගෙන වෙනත් භාජනයකට දමාගන්න. ඒ රොටි තුනී කරන විට රොටියට පිටි ඉස ගැනීම සඳහාය.

රොටිය තුනී කර ගැනීමට පැතලි ලෑල්ලක් හෝ පිරිසිදු ටයිල් කැටයක් යොදාගත හැක. මෙහිදී මතුපිට පෘෂ්ඨය මෘදුව පැවතීම අනිවාර්යය වේ. පෘෂ්ඨය කඩතොළු සහිත වුවහොත් රොටිය ඇලීමට ඉඩකඩ වැඩිය.

ඒ වගේම ලී රෝලරයක් හෝ අඟලක පමණ ඝනකම සහිත අඩි 1½ පමණ P.V.C බට කැබැල්ලක් උචිතය.

තුනී කරගත් පිටි ගුලිය ආටා පිටි භාජනයට දමා පිටි යාන්තමින් තවරා ගන්න. දැන් ලෑල්ල මත තබා ලී රෝලකින් පිටි සමානව බෙදෙන ආකාරයට රවුමට පිටි ටික තුනී කර ගන්න.

මෙසේ තුනී කරන විට රෝලෙහි පිටි ගුලිය ඇලෙන ගතියක් ඒවි. එවිට තව පිටි ස්වල්පයක් ඉස ඇලෙන ගතිය නැති කරගෙන දිගට ම තුනී කර ගන්න. මෙහිදී ඔබ එක අතකට සාපේක්ෂව අනිත් අතට යොදන බලය මඳක් අඩු කරන්න. එවිට ඔබට තේරේවි රොටිය තුනී වෙන කොට මඳක් කරකැවෙන ස්වභාවයක් ඇතිවන බව. එසේ රොටිය කරකැවෙන විට එය ඒකාකාරව පිටි ටික හොඳින් තුනී වීමට උපකාරී වේ. මුලින් ම කරන කෙනෙකුට ටිකක් අපහසු ගතියක් දැනේවි. නමුත් දිගට ම රොටී තුනී කරන විට නිරායාසයෙන් ම හුරු වේ.

මෙසේ සකසා ගත් රොටිය ඉක්මනින් ම පුළුස්සාගත යුතුය. නැතිනම් මිශ්‍රණයේ ජලය ඉවත් වී රොටියේ මෘදුභාවය නැති වේ.

රොටිය පුළුස්සා ගැනීම.

මෙහිදී සැලකිලිමත් විය යුතු කරුණු රාශියක් තිබේ. ලංකාවේ ක්‍රමයට රොටී සාදන විට ලිපේ ගොඩක් වෙලා පුළුස්සා ගනී. නමුත් මේ චපාති ඉක්මණින් ම පුළුස්සාගෙන ලිපෙන් බාගත යුතු වේ.

අපි ගන්න තැටියේ ස්වභාවය අනුව ලිපට ගින්දර දැමීම සිදුවිය යුතුය. අඩු ගින්දරේ තමයි මේ රොටිය සෑදිය යුත්තේ. තැටියේ ඝනකම වැඩි නම් මඳක් ගින්දර වැඩි විය යුතුය. අපි සාදාගත් රොටිය තැටිය රත් වූ පසු තැටියට දමා තත්පර 15ක් වැනි කාලයක් පළමු පැත්ත පුළුස්සා ගත යුතු වේ. මෙහිදී උඩු පැත්තේ බුබුළක් දෙකක් පිපෙනවා ඔබට දැකගත හැකි වේ.

පැතලි හැන්දක් භාවිතා කර රොටිය අනෙක් පැත්ත පෙරලාගෙන පුළුස්සාගත යුතු වේ. එවිට රොටිය මඳක් පිම්බෙන ස්වභාවය ඔබට දැකගත හැකි වේ. මේ පැත්ත තත්පර 30ක පමණ කාලයක් පුළුස්සාගත යුතු වේ. ඔබ රොටිය පුළුස්සන විට රොටිය ඉක්මනින් පිච්චෙනවා නම් ගින්දර සැර අඩු කරන්න. පමණට වඩා කාලය ගතවේ නම් ගින්දර සැර වැඩි කරන්න.

ඒ පැත්ත පුළුස්සාගත් පසු තැටියේ ම අනෙක් පැත්ත දමා පිරිසිදු රෙදි කඩක් ගෙන අත පිච්චෙන්නැති ආකාරයට රොටිය මඳක් තෙරපුමට ලක් කරන්න. එවිට චපාතිය තැටිය මතදී ම පපඩමක් ආකාරයට පිපීගෙන ඒවි. එසේ නැතිනම් ඔබට අඬුවක් භාවිතයෙන් ගින්දරට ඍජුව ම අල්ලා රොටිය පුම්බාගත හැකිවේ. මෙහිදී වඩාත් අවධානයෙන් යුතුව මෙම කටයුත්ත සිදුකළ යුතු වේ.

මෙසේ පුච්චාගත් චපාති රොටිය වාතයට නිරාවරණය වන පරිදි තැබුවහොත් එය ඉක්මනින් තද භාවයට පත්වේ. මෙය වළකා ගැනීම සඳහා රස්නය ඉවත් නොවන භාජනයකට (Hot Pot) දමාගත යුතු වේ. නැතිනම් භාජනයකට පිරිසිදු කපු රෙදි කැබැල්ලක් දමා එම භාජනයට රොටී ටික දමාගෙන රෙද්දෙන් හොඳින් වසාගත යුතු වේ. මේ නිසා රොටියේ නැවුම්බව රැකෙන අතර උණුසුම්භාවය ද රැකේ. දැන් ඔබට ඉතා මෘදුභාවයෙන් යුතු චපාතියක රස විඳිය හැක. මේ සඳහා කලින් කලාපයක අප ඉදිරිපත් කළ ඉන්දියානු අල බැදුම සමඟ මෙය වඩාත් රසවත් වේ.

ඉතින් ඔබත් උත්සහයක් දරන්න නිවැරදිව මෘදුවට චපාති හදන්න. පවුලේ අය සමඟින් රස බෙදාගෙන සතුටක් විඳින්න. හැකි අවස්ථාවක හීල දානය සඳහා ද පූජා කරගෙන පින් රැස් කර ගන්න.

“දත්වා ච භුත්වා ච යථානුභාවං
අනින්දිතෝ සග්ගමුපේති ඨානං”

“තමාගේ ශක්ති පරිදි ප්‍රණීත දන් දී, ප්‍රණීත ආහාර තමාත් අනුභව කොට නින්දා රහිත සුගතියෙහි උපදී”

“මනාපදායී ලභතේ මනාපං”

“මනාප දේ දෙන්නා මනාප දේ ලබයි” යනු බුදු වදන් ය. ඒ අනුව බලන විට ආහාරයට ගැරහීම නුසුදුසු ය.

ඔබට ජය ශ්‍රී. සුභ දවසක්!

ඔබේ හිතාදර

අෂාන් ඉමල්ක.

අතීතයේ සිට ම හේන් ගොවිතැන් ආදිය කරන විට ගොවියෝ හේනෙන් ගලවා ගත් මඤ්ඤොක්කා අලයක්, කොච්චි මිරිස් සම්බෝලයක් හෝ ලුණු මිරිසක් සමඟ අනුභව කොට තම කුස පුරවා ගන්න පුරුදු ව සිටියහ. මිරිස් භාවිතයට පුරුදු ව සිටින අපි අද අලුත් ක්‍රමයකට අමු මිරිස් බැදුමක් සාදන ආකාරය බලමු. මේ සඳහා අප යොදා ගන්නේ වෙළඳපොළේ සුලබව මිල දී ගන්න පුළුවන් අමු මිරිස් කරල් ය. ටිකක් දිග හා මහත ඒවා නම් මේ සඳහා වඩාත් ගැළපෙයි.

අවශ්‍ය ද්‍රව්‍ය

01. අමු මිරිස් කරල් 10ක් පමණ
02. ලුණු කුඩු ස්වල්පයක්
03. අබ කුඩු ස්වල්පයක්
04. දෙහි බෑයක ඇඹුල්
05. පොල්තෙල් මේස හැඳි 02ක් පමණ

සාදා ගන්නා ආකාරය.

මුලින් ම අප කළ යුත්තේ අමු මිරිස් කරල් ටික හොඳින් සෝදා ගැනීම ය. මෙසේ සෝදා ගත් අමු මිරිස් කරල් ටිකේ වතුර හොඳින් පෙරා ගන්න.

ඉන්පසු පිරිසිදු වියළි රෙදි කැබැල්ලක් මත හෝ ටිෂූ කඩදාසියක් මත තබා අමු මිරිස් කරල්වල තැවරී ඇති ඉතිරි වතුර ටික ද පිසදා ගන්න. මෙසේ පිසදා ගත් අමු මිරිස් කරල් එකින් එක ගෙන, මාළු මිරිස් පිරවුමට සකසන පරිදි, පිහියක ආධාරයෙන් ප්‍රවේශමෙන් එක් පැත්තක් පළා ගන්න. මෙසේ පළා ගත් අමු මිරිස් කරල් සියල්ල ම භාජනයකට දමා ගන්න.

භාජනයකට දමා ගත් අමු මිරිස් කරල් මතට ලුණු කුඩු ස්වල්පයක් ඉස, හොඳින් කලවම් කරගන්න. සෑම මිරිස් කරලකට ම ලුණු තැවරෙන ආකාරයට සකසා ගන්න.

දැන්, මිරිස් කරල් දැමීමට සරිලන ප්‍රමාණයේ තාච්චියක් ගෙන ලිප මත තබා ගින්දර දල්වන්න. තාච්චිය රත් වූ පසු පොල්තෙල් මේස හැඳි 2ක් පමණ දමා, රත් වෙන්නට හරින්න. තෙල් රත් වූ පසු, ගින්දර සැර අඩු කර මිරිස් කරල් ටික පරිස්සමින් තෙලට දමා ගන්න. අමු මිරිස් ටික බැදීගෙන එන විට අබ කුඩු ටික මිශ්‍ර කර ගන්න. අඩු ගින්දරේ ම තබමින් බැද ගන්න. අමු මිරිස්වල පැහැය මඳක් ළා කොළ පැහැති සුදු හුරුවක් ගන්න විට ම ලිප නිවා දමන්න.

මෙසේ සකසා ගත් අමු මිරිස් බැදුම වෙනත් භාජනයකට මාරු කර ගන්න. මඳක් නිවුණු පසු දෙහි බෑයක ඇඹුල් මිශ්‍ර කර එහි රසය වැඩි කර ගන්න. දැන් ඔබට සුළු වේලාවකින් සාදාගත් රසවත් අමු මිරිස් බැදුමක රස විඳිය හැකිය. මෙය වඩාත් සුදුසු වන්නේ බත් සමඟ ආහාරයට ගැනීමට ය. ඔබේ පවුලේ මිරිස් සැරට කැමති කෙනෙකුට ආහාර වේලක් සාදා දෙන විට අලුත් විදිහකට මෙය පිළිගන්වන්න පුළුවන්.

ඒ වගේම දහවල් දානයක් ලද අවස්ථාවක සකසා පූජා කර ගැනීමට ද කදිම බැදුමකි. ඔබත් රස විඳින්න. අන් අයට ද සකසා දී පින් රැස් කර ගන්න.

“දත්වා ච භුත්වා ච යථානුභාවං
අනින්දිතෝ සග්ගමුපේති ඨානං”

“තමාගේ ශක්ති පරිදි ප්‍රණීත දන් දී, ප්‍රණීත ආහාර තමාත් අනුභව කොට නින්දා රහිත සුගතියෙහි උපදී”

“මනාපදායී ලභතේ මනාපං”

“මනාප දේ දෙන්නා මනාප දේ ලබයි” යනු බුදු වදන් ය. ඒ අනුව බලන විට ආහාරයට ගැරහීම නුසුදුසු ය.

ඔබට ජය ශ්‍රී. සුභ දවසක්!

ඔබේ හිතාදර

අෂාන් ඉමල්ක

මෙසේ ඉස්සෝ ආදී මත්ස්‍යයන් මිලදී ගැනීමට තිබුන ද එහි මිල ගණන් සමඟ බොහෝ දෙනෙක් එදිනෙදා කෑම වේලට එකතු කර ගැනීමට අපහසුතාවයක් දක්වති. නමුත් සුවිශේෂී උත්සව ආදිය හා දානමය පුණ්‍ය අවස්ථාවලදී කෑම වේලට ඉස්සෝ ව්‍යංජනය සෑදීමට බොහෝ දෙනා ප්‍රිය කරති. නිතර සාදන්නේ නැති නිසාම බොහෝ දෙනෙකුට රසවත් ආකාරයට සාදාගැනීමට දැනුමක් නැත්තේය. ඒ නිසා මේ ලිපිය තුළින් ඉස්සෝ කන්න කැමති අයට රසවත් විදිහකට ඉස්සෝ සාදාගන්නා ආකාරය ගැන දැනුමක් ලබාදීමට උත්සාහ කරන්නෙමු.

වෙළඳ පොළේ දී ඉස්සෝ දෙවර්ගයක් මිලදී ගැනීමට ඇත. එක් වර්ගයක් නම් කලපුවල වගා කරන කලපු ඉස්සෝ ය.

නැත්නම් ටයිගර් ඉස්සා කියා ද කියයි. අනෙක් වර්ගය කිරි ඉස්සා නැත්නම් මුහුදු ඉස්සා ය. මොවුන්ගේ පැහැය සුදු පාට නිසා පහසුවෙන් හඳුනාගත හැකිය. කලපු ඉස්සා අඳුරු පැහැති පුල්ලි ගතියකින් දිස්වේ. මේ අතරින් මුහුදු ඉස්සා වඩාත් රසවත් වේ.

ඉස්සෝ 1 kg ප්‍රමාණයකට අවශ්‍යය කුළුබඩු වර්ග බලමු.

1. අමුමිරිස් කරල් 4ක් 5ක්
2. ලූනු ගෙඩි 2
3. සුදුළුණු ගෙඩි භාගයක්
4. තක්කාලි ගෙඩි 4
5. ලීක්ස් ගසක්
6. පොල් අඩලයක පොල්
7. සියඹලා ස්වල්පයක්
8. ගම්මිරිස් ඇට අහුරු භාගයක්
9. වියළි මිරිස් කරල් 10ක් පමණ
10. උළුහාල් ඇට කිහිපයක්
11. බැදපු තුනපහ සාදා ගැනීම සඳහා සූදුරු හා මහදුරු ස්වල්පයක්
12. කොත්තමල්ලි මේස හැඳි 4ක් පමණ
13. කුරුඳු හා එනසාල් ස්වල්පයක්
14. රම්පේ හා කරපිංචා
15. පොල්තෙල්
16. ලුණු රස පදමට

මුලින්ම කළ යුත්තේ ඉස්සෝ ටික හොඳට පිරිසිදු කරගැනීමය. කතාවටත් කියනවනේ ඉස්සෙක් වගේ ඔළුවෙ ජරාව තියාගන්න එපා කියලා. ඒ කියන්නේ ඉස්සාගේ හිස ප්‍රදේශයේ තමයි බහිස්‍රාවිය දේවල් එකතු වෙලා තියෙන්නෙ. එම අපිරිසිදු කොටස් මුලින්ම හිස සමඟම ඉවත්කර ගන්න. ඉතිං මේ හිස කොටස හොදින් සෝදලා තමයි චිලීපේස්ට් සෑදීමට ගන්නේ.

තමාගේ රුචිකත්වය අනුව පිට කොන්ද දිගේ තිබෙන පොතු ආවරණය තබාගැනීම හෝ ඉවත්කර ගැනීම සිදුකළ හැකිය. පොතු ඉවත් කළ ඉස්සා පිසින විට ගොඩාක් පොඩි වීමක් සිදු වෙනවා. ඒ නිසා අපි පොත්ත සමඟම හොඳින් පිරිසිදු වතුරෙන් සෝදා තමයි අපේ ව්‍යංජනය හදන්න ගන්නේ. එය පසෙකින් තබාගන්න.

දැන් අපි කළ යුත්තේ අපට අවශ්‍ය තුනපහ ටික සාදා ගැනීම යි.

මුලින්ම තාච්චියක් ගෙන වියළි මිරිස්කරල් ටික බැදගන්න ඕනි. ඒ සඳහා ලිප මත තබන තාච්චියට ගින්දර දමා මඳක් රත්කර ගන්න. නැටි ඉවත්කරන ලද මිරිස් කරල් ටික දමා ගින්දර පාලනය කරමින් මිරිස් කරල් ටික බැදගන්න ඕනි. පොල්කටු හැන්දක් හෝ ඊට සමාන හැන්දක් ගෙන නිතර මිරිස් කරල් පෙරලිය යුතුය. ගින්දර ටිකක් වැඩිකර දුම දමන විටම ගින්දර සැර අඩුකර බැදගන්න ඕනි. ඒ වගේම නැවත නැවත ගින්දර අඩු වැඩි කර මඳක් කළු පැහැ වන තුරු බැදගන්න ඕනි. මෙසේ හොඳින් බැදුනු මිරිස් කරල් ටික පැත්තකින් තබාගෙන නිවෙන්නට අරින්න.

ඊළඟට මේ තාච්චියට ම ගම්මිරිස් ඇට දමා ඉහත ආකාරයට ම හොඳින් බැදගෙන පසෙකින් තබාගන්න.

ගම්මිරිස් ටික බැදගත් පසු එම තාච්චියේ ම බැදපු තුනපහ සාදාගත හැක. මෙ⁣හිදී සූදුරු, මහදුරු, කොත්තමල්ලි, අබ ආදිය වෙන වෙනම හෝ එකටම බැදගත හැකිය. වඩා පහසු ක්‍රමය නම් එකටම බැද ගැනීමය. ඒ සඳහා මුලින්ම තාච්චියට කුරුඳු පොතු කෑල්ලක් දමන්න. ඉන්පසු එනසාල් ඇට 5-6ක් පමණ දමා මඳක් බැද ගන්න. ඉන්පසු එයටම කොත්තමල්ලි ඇට දමා බැදගත හැකිය. එයත් හොඳින් බැදගත් පසු එම මිශ්‍රණයට ම සූදුරු හා මහදුරු එක්කළ හැකිය. සූදුරු හා මහදුරු ඉක්මනින් බැදෙන නිසා වැඩිවෙලා ලිප මත මෙම මිශ්‍රණය තබාගත නොහැක. සූදුරු මහදුරු කළු වීමට පෙර තාච්චියෙන් බාගෙන වෙනත් භාජනයකට දමා ගන්න.

ඊළඟට ගාගත් පොල් ටික තාච්චියට දමා බැදගන්න ඕනි. එයටම සෝදාගත් කරපිංචා සහ සෝදා සිහින්ව කපාගත් රම්පේ තමාගේ රුචිකත්වය පරිදි දමා බැදගත හැකිය. කලින් ආකාරයට ම ගින්දර අඩු වැඩි කරමින් හොඳින් බැදගන්න. හොඳින් බැදුනු පසු වෙනත් භාජනයකට දමන්න.

මෙසේ බැදගත් සියලුම දේවල් ටික බ්ලෙන්ඩරයක් ආධාරයෙන් හොඳට කුඩු කරගන්න. මිරිස් ගලේ වුනත් අඹරා ගන්න පුළුවන්. පොල් ටික අඹරා ගන්නාවිට මඳක් වතුර එක්කර ගැනීමට සිදුවේ. මෙසේ අඹරා ගන්නා ලද මිරිස්, ගම්මිරිස්, බැදපු තුනපහ හා බැදගත් පොල් මිශ්‍රණය ටිකක් විශාල භාජනයකට දමා මිශ්‍ර කර ගන්න.

තක්කාලි ගෙඩි 4 පමණ ගෙන බ්ලෙන්ඩරය ආධාරයෙන් පල්පයක් විදිහට බ්ලෙන්ඩර් කරගන්න. දැන් එම තක්කාලි ඉස්ම ටික තුනපහ දැමූ භාජනයට දමා හොඳින් මිශ්‍ර කර ගන්න. එයට ම අපි කලින් පිරිසිදු කරගත් ඉස්සෝ ටිකක් දමා හොඳට පදම් වෙන්න තබන්න. අවශ්‍ය නම් ලුණු ද දමන්න.

අමුමිරිස් ටික ද සෝදා ගන්න. එය සිහින්ව කපා ගන්න. බී ලූනු හා සුදුලූනුවල පොතු ඉවත් කර සිහින්ව කපා ගන්න. ලීක්ස් ගස ද ගෙන හොඳින් සෝදා සිහින්ව එයත් කපා ගන්න.

දැන් ලිප මත තාච්චියක් තබාගෙන පොල්තෙල් ටිකක් දමන්න. ලිපෙහි ගින්දර මදක් වැඩිකර තෙල්ටික හොඳින් රත්කර ගන්න. තෙල් රත් වූ පසු ගින්දර මඳක් අඩුකර කපාගත් අමුමිරිස්, බී ලූනු, සුදුලූනු හා ලීක්ස් ටික වෙන වෙනම තෙලෙන් බැද ගන්න. මෙහිදී අවශ්‍ය පරිදි පොල්තෙල් යොදාගන්න. අමුමිරිස්, බී ලූනු, සුදුලූනු හා ලීක්ස් ටික බැදගත් පසු වෙනත් භාජනවලට දමමින් මඳක් සිසිල් වෙන්න ඉඩහරින්න. ඉන්පසු ඒවාද බ්ලෙන්ඩරයක් ආධාරයෙන් හොඳට බ්ලෙන්ඩර් කරගන්න. බ්ලෙන්ඩර් කරගත් මිශ්‍රණය පසෙකින් තබාගන්න.

දැන් ඉස්සෝ ව්‍යංජනය සෑදීමට සරිලන මැටි හට්ටියක් හෝ තාච්චියක් ගෙන ලිප මත තබාගන්න. එයට පොල්තෙල් ස්වල්පයක් දමා තෙල් රත් වූ පසු උළුහාල් ඇට කිහිපයක් දමන්න. උළුහාල් ටික මඳක් බැදෙන විට බී ලූනු සහිත මිශ්‍රණය එයට දමන්න. සියඹලා ටිකත් දමන්න. ටික ටික එක්කර හොඳින් කලවම් කරන්න. ඉන්පසු ඉස්සෝ මිශ්‍රණය පරිස්සමින් ලිප මත ඇති භාජනයට එක්කරන්න. එයත් හොඳින් මිශ්‍ර කරන්න. අවශ්‍ය නම් ජලය එක්කළ හැක. ගින්දර දමමින් හොඳට පිසගන්න. ටිකෙන් ටික ඉස්සෝ රතු පැහැ වෙනවා දැකගත හැක. මෙසේ හොඳින් පිස ගන්නා ඉස්සෝ ව්‍යංජනයට ඔබේ රස ප්‍රමාණයට ලුණු බලා එක්කර ගන්න. සීනි ටිකක් ද දැම්මොත් තවත් රස වැඩි වේ. සීනි එක්කළ යුත්තේ හොඳින් ඉස්සෝ පිසුණු පසුය.

සාමාන්‍යයෙන් පැය 1/2 ක පමණ කාලයකදී හොඳින් පිසගත හැකිය. මේ ආකාරයට ඉස්සෝ ව්‍යංජනයක රස බැලුවොත් ඔබට නැවත හදන්න ඕනෑ වෙනවාම යි. ඉතිං ඔබත් අවස්ථාවක් ලැබුනොත් පවුලේ අයට සාදා දෙන්න. උත්සව අවස්ථාවකට ඉතා කදිමය. දහවල් දානයකට පොල්සම්බෝල සමඟ මේ ඉස්සෝ ව්‍යංජනය පමණක් වුවත් සෑහේ. ප්‍රණීත දේ දන් දී බොහෝ පින් රැස්කරගත හැකිය.

“දත්වා ච භුත්වා ච යථානුභාවං
අනින්දිතෝ සග්ගමුපේති ඨානං”

“තමාගේ ශක්ති පරිදි ප්‍රණීත දන් දී, ප්‍රණීත ආහාර තමාත් අනුභව කොට නින්දා රහිත සුගතියෙහි උපදී”

“මනාපදායී ලභතේ මනාපං”

“මනාප දේ දෙන්නා මනාප දේ ලබයි” යනු බුදු වදන් ය. ඒ අනුව බලන විට ආහාරයට ගැරහීම නුසුදුසු ය.

ඔබට ජය ශ්‍රී. සුභ දවසක්! ඔබේ හිතාදර

අෂාන් ඉමල්ක

දියවැඩියා රෝග තත්ත්වය පාලනය සඳහා නම් දරා ඇති මේ භෝගය කොලෙස්ටරෝල් පාලනයට ද සමත් ය. ඒ වගේම පිළිකා කාරක සෛල විනාශ කිරීමේ හැකියාවක් පවතින අතර ශරීරයේ ප්‍රතිශක්තිය වර්ධනය කිරීමේ ඉහළ හැකියාවක් කරවිලවල අඩංගු වේ.

ඔබගේ ආහාර රටාව වඩාත් රසවත් මෙන් ම ගුණදායක ආහාරවලින් පොහොසත් කර ගැනීමට උත්සහ කළ යුතුය. පොඩි දරුවන්ට පවා ආසා හිතෙන ආකාරයට තිත්ත රස නැතිව කරවිල සාදා ගන්නා ආකාරයක් පිළිබඳව අද අපි ඉගෙන ගනිමු.

අවශ්‍ය ද්‍රව්‍ය.

01. කරවිල කරල් 4ක් හෝ 5ක්
02. පාන්පිටි ස්වල්පයක්
03. මිරිස් කුඩු ස්වල්පයක්
04. කහ කුඩු ස්වල්පයක්
05. ලුණු රස පදමට
06. පොල්තෙල්
07. අමු මිරිස් කරලක්
08. බී ලූනු ගෙඩියක්
09. තක්කාලි ගෙඩියක්

සාදා ගන්නා ආකාරය.

මුලින් ම අප කළ යුත්තේ කරවිල කරල් ටික හොඳින් සෝදා ගැනීම ය. ඉන්පසු ජලය හොඳින් ඉවත්වන තුරු සිදුරු සහිත භාජනයක දමා ගන්න. ජලය හොඳින් පෙරුණු පසු හොඳින් කැපෙන පිහියක් ගෙන ලෑල්ලක් මත තබා කරවිල ගෙඩිය සිහින් පෙති ආකාරයට කපා ගන්න. භාජනයකට දමා පසෙකින් තබා ගන්න.

දැන් තෙල් තාච්චියක් ගෙන පොල්තෙල් අවශ්‍ය ප්‍රමාණයට දමා ලිප මත තබා ගන්න. ගිනි දල්වා පොල්තෙල් ටික හොඳින් රත් කර ගන්න. පොල්තෙල් ටික හොඳින් රත් වූ පසු ලිපේ ගින්දර මඳක් අඩු කරගන්න.

එක වතාවකට බැද ගත හැකි කරවිල පෙති ප්‍රමාණය ගෙන එම කරවිල පෙති මතට පාන්පිටි ස්වල්පයක් ඉස ගන්න. මෙහිදී ඔබ ගත් කරවිල ප්‍රමාණයට සෑහෙන පරිදි පාන් පිටි එක් කිරීම සිදු කළ යුතුය. එය සෑම කරවිල පෙත්තක ම තැවරීමට තරම් ප්‍රමාණවත් විය යුතුය.

එම මිශ්‍රණයට ම මිරිස් කුඩු ස්වල්පයක් හා කහ කුඩු ස්වල්පයක් මිශ්‍ර කරන්න. ඔබගේ රස ප්‍රමාණයට ලුණු කුඩු මිශ්‍ර කරන්න. මෙසේ සාදාගත් කරවිල පෙති මිශ්‍රණය පරිස්සමින් තෙල් තාච්චියට දමා හොඳින් බැද ගන්න. මෙහිදී පෙණ ගතිය ඉවත් වනතුරුම ගින්දර අවශ්‍ය පරිදි අඩු වැඩි කරමින් ලා දුඹුරු පැහැ වන තෙක් බැද ගන්න. තෙල් හැන්දක් භාවිතා කරමින් කරවිල පෙති ඉවතට ගෙන කඩදාසියක් දැමූ භාජනයකට දමා ගන්න. කරවිල පෙති ටික තෙල් තාච්චියෙන් බාගන්නා මොහොතේ ලිපේ ගින්දර අඩු කිරීමට මතක තබා ගන්න.

දැන් නැවත අවශ්‍ය ප්‍රමාණයට කරවිල පෙති ගෙන ඉහත මිශ්‍රණය සාදාගෙන තෙලෙන් බැද ගන්න. මෙහිදී ඔබ මෙම මිශ්‍රණය තෙලට දැමීමට සුළු මොහොතකට පෙර සෑදිය යුතු වේ. නැති නම් පාන්පිටිවලට ජලය උරාගැනීම නිසා කරවිල බැදුමේ crispy ගතිය නැති වී යයි. මෙසේ crispy ගතියට සාදා ගත් කරවිල පෙති chips විදිහට ද කැමති නම් කන්න පුළුවන්.

එය තවත් රසවත් කර ගැනීම පිණිස, අමු මිරිස් කරලක් ගෙන සිහින්ව කපා ගන්න. බී ලූනු ගෙඩියක් ද ගෙන සිහින්ව කපා ගන්න. තක්කාලි ගෙඩිය ද තරමක කෑලි සිටින සේ කපා ගන්න. දැන් ඒ කපා ගත් අමු මිරිස්, බී ලූනු හා තක්කාලි ටික ගෙන භාජනයකට දමා ගන්න. එම භාජනයට ම crispy කරවිල පෙති ටික මිශ්‍ර කරගන්න. දැන් හොඳින් කලවම් කර ගන්න. අවශ්‍ය නම් ලුණු ස්වල්පයක් ද එක් කර ගන්න. දැන් ඔබට රසවත් කරවිල බැදුමක රස විඳිය හැකිය. මෙහි කිසි ම තිත්ත රසයක් නොමැති අතර ඕන තරම් කන්න ආසා හිතෙයි.

ඉතින් ඔබත් අවස්ථාවක් ලද විගස මේ ආකාරයට කරවිල රස විඳින්නට අමතක කරන්න එපා. පවුලේ අය සමඟ ද බෙදාහදා ගෙන පින් රැස් කර ගන්න. ඒ වගේ ම සංඝ දානයකදී දහවල දානයක් සඳහා මෙය වඩාත් උචිත වේ. මෙසේ සඟරුවන උදෙසා ද රසවත් හා ගුණදායක ආහාර පූජා කිරීමෙන් දුර්ලභව ලද මනුස්ස දිවිය තුළ පින් රැස් කර ගැනීමට වාසනාව උදා වේවා..!

“දත්වා ච භුත්වා ච යථානුභාවං
අනින්දිතෝ සග්ගමුපේති ඨානං”

“තමාගේ ශක්ති පරිදි ප්‍රණීත දන් දී, ප්‍රණීත ආහාර තමාත් අනුභව කොට නින්දා රහිත සුගතියෙහි උපදී”

“මනාපදායී ලභතේ මනාපං”

“මනාප දේ දෙන්නා මනාප දේ ලබයි” යනු බුදු වදන් ය. ඒ අනුව බලන විට ආහාරයට ගැරහීම නුසුදුසු ය.

ඔබට ජය ශ්‍රී. සුභ දවසක්!

ඔබේ හිතාදර

අෂාන් ඉමල්ක.

මේ මඤ්ඤොක්කා පැටි (Cassava patty) short eats සඳහා හොඳ ආදේශකයකි.

මේ සඳහා අවශ්‍ය දෑ මොනවා දැයි කියා බලමු.

1. මඤ්ඤොක්කා 1kg පමණ අලයක් හෝ දෙකක්
2. පොඩි සැමන් ටින් එකක් (ඔබ vegetarian නම් සැමන් නැතිව ද සාදාගත හැකිය.)
3. සුදුලූනු බික් 4 හෝ 5 ක්
4. කරපිංචා ඉති 2 ක්
5. අමු මිරිස් හෝ කොච්චි මිරිස් කරල් 2ක්
6. බී ලූනු ගෙඩියක්
7. තරමක ලීක්ස් ගසක්
8. කෑලි මිරිස් ස්වල්පයක්
9. ගම්මිරිස් ටිකක්
10. කහ ස්වල්පයක්
11. ලුණු

මුලින් ම අප කළ යුත්තේ මඤ්ඤොක්කා අල ටික හොඳින් තම්බා ගැනීමයි. හුලං නොවැදුණු අලුත් මඤ්ඤොක්කා වෙළඳපොළෙන් මිල දී ගැනීමට වග බලා ගන්න. වත්තේ සෑදුණු ඒවා නම් විශ්වාසයෙන් යුතුව භාවිතයට ගත හැකිය.

මෙසේ සපයා ගත් නැවුම් මඤ්ඤොක්කා ටික පොතු ඇර සාස්පානකට හෝ මුට්ටියකට දමා හොඳින් තම්බා ගන්න. හොඳින් තැම්බුණු පසු වතුර ටික පෙරා, වැඩි වතුර හිඳෙන තුරු මඳ ගින්දරේ තබා, හොඳින් පිටි ගතිය එන තෙක් වතුර ටික වාෂ්ප කර ගන්න. මෙය අවසන් වූ පසු මඤ්ඤොක්කා ටික නිවෙන්නට හරින්න.

මේ මඤ්ඤොක්කා ටික තම්බා ගන්නා අතරවාරයේ සුදුලූනු ටික පොතු ඉවත් කර සිහින් ව කපා ගන්න. කරපිංචා, අමුමිරිස් හෝ කොච්චි මිරිස් ටික හා බී ලූනු ගෙඩිය ද සිහින් ව ලියා ගන්න. මේවා වෙන වෙනම තැටියක දමා පසෙකින් තබා ගන්න.

දැන් ලිප මත තාච්චියක් තබා පොල්තෙල් ටිකක් දමා ගන්න. පොල්තෙල් ටික හොඳින් රත් වූ පසු මද ගින්නේ මුලින් ම තෙලට සුදුලූනු ටික දමන්න. ඒ ටික බැදීගෙන එන විට කරපිංචා හා අමුමිරිස් ටික ද එක් කරන්න. එම මිශ්‍රණය මදක් බැදුණු පසු බී ලූනු ටික එක් කරන්න. එය රන්වන් පැහැය වන තෙක් හොඳින් බැද ගන්න. ඉන් පසු කපා ගත් ලීක්ස් ටික තෙම්පරාදුවට එක් කර ගන්න. වතුර ගතිය හිඳෙන තුරු තෙලින් හොඳට මලවා ගන්න.

මෙසේ තෙම්පරාදුවේ වතුර ගතිය ඉවත් වූ පසු කෑලි මිරිස් ටික, ගම්මිරිස් කුඩු හා කහ ස්වල්පයක් ඔබේ රසයේ ප්‍රමාණයට එක් කර ගන්න. එයට ලුණු ද එක්කර රස වැඩි කර ගන්න. දැන් එම මිශ්‍රණයට වතුර ඉවත් කර ගත් සැමන් මාලු ටික එක් කර ගන්න සැමන් සමඟ මිශ්‍රණය හොඳින් කලවම් කර මඳක් තෙලෙන් බැද ගන්න. දැන් ලිප නිවා දමා මිශ්‍රණය සිසිල් වෙන්න ඉඩ හරින්න.

කලින් තම්බා ගත් මඤ්ඤොක්කා අල ටික හොඳින් පොඩි කර ගත යුතුය. එහි ඇති මැද නාරටි ද ඉවත් කර ගත යුතු ය. මෙසේ හොඳින් පිටි වන තෙක් පොඩි කර ගත් මඤ්ඤොක්කා ටික වෙනත් භාජනයකට දමා ගන්න. එම භාජනයට ම අපි සකසා ගත් තෙම්පරාදුව ද එක් කර හොඳින් මිශ්‍ර කර ගන්න.

මෙසේ සකසා ගත් මඤ්ඤොක්කා පැටි මිශ්‍රණය තෙල් තවරා ගත් (කේක් සෑදීමට ගන්නා) ඇලුමිනියම් ට්‍රේ එකකට හෝ ඊට සමාන භාජනයකට දමා ගත යුතු ය. ඉන්පසු එම මිශ්‍රණය කිරිබත් කැපීමට සකසන පරිදි මඳක් ගනකම එන ලෙස හොඳින් තුනී කර ගන්න. මෙසේ තුනී කර ගත් මිශ්‍රණය අවශ්‍ය පරිදි කොටුවට කපා ගන්න. මාළුරොටී සාදනවිට ගන්නා ප්‍රමාණය බෙහෙවින් උචිත වේ. මෙසේ කපා ගත් කැබැලි එකින් එක වෙන් කර ගන්න. එම තැටියේම තබා ගත හැකිය.

දැන් රොටී තැටියක් ගෙන ලිප මත තබා රත් කර ගන්න. ඉන් පසු පොල්තෙල් ටිකක් දමා රත් වූ තැටිය පුරා තවරා ගන්න. දැන් මඤ්ඤොක්කා පැටි එකින් එක ගෙන එහි සෑම පැත්තක් ම (එළවළු රොටී හෝ මාළුරොටී සාදන ආකාරය මෙන්) පැත්තෙන් පැත්ත යාන්තමට පුච්චා ගන්න. අවසානයේ මාළු රොටී ආකාරයෙන් ම මෙම මඤ්ඤොක්කා පැටි දිස් වේ.

මෙසේ සකසා ගත් මඤ්ඤොක්කා පැටි මඳක් නිවුණ පසු රස විඳින්න පුළුවනි. ඔබ දුරබැහැර ගෙන යන්නේ නම් ඇලුමිනියම් foil එකක ඔතාගෙන හෝ hot pot එකක දමාගෙන රැගෙන යා හැකිය.

මෙම මඤ්ඤොක්කා පැටි උදෑසන හීල දානයකට ද පූජා කර ගැනීමට ඉතා කදිමය. පවුලේ අය සමඟ ද බෙදා ගෙන රස විඳිය හැකිය. තක්කාලි සෝස් වැනි දෙයක් සමඟ ඉතාමත් රසවත් වේ. මෙය අමතක නොවන ඉතා රසවත්, ප්‍රණීත රසැති ගුණවත් ආහාරයකි.

“දත්වා ච භුත්වා ච යථානුභාවං
අනින්දිතෝ සග්ගමුපේති ඨානං”

“තමාගේ ශක්ති පරිදි ප්‍රණීත දන් දී, ප්‍රණීත ආහාර තමාත් අනුභව කොට නින්දා රහිත සුගතියෙහි උපදී”

“මනාපදායී ලභතේ මනාපං”

“මනාප දේ දෙන්නා මනාප දේ ලබයි” යනු බුදු වදන් ය. ඒ අනුව බලන විට ආහාරයට ගැරහීම නුසුදුසු ය.

ඔබට ජය ශ්‍රී. සුභ දවසක්!

ඔබේ හිතාදර

අෂාන් ඉමල්ක

දකුණු ආසියාතික රටවල්වලට ආවේණික ශාකයක් ලෙස කොස් ගස හඳුනා ගත හැකිය. එහි හට ගන්නා ඵලය මදක් මේරූ පසු පොලොස් මැල්ලුම් ආකාරයට හෝ පොලොස් ව්‍යංජන ආකාරයට ද ආහාරයට ගනියි. මින් පෙර ලිපියක පොලොස් ව්‍යංජනයක් ඉතා පහසුවෙන් රසවත් ව සාදා ගන්නා ආකාරය අප ඉදිරිපත් කර ඇත. එම කොස් ඵලය තව දුරටත් මේරී හොඳින් පැහුණ පසු කොස් මැල්ලුම් හෝ කොස් ව්‍යංජනය ආකාරයට ද ආහාරයට ගත හැකිය. හොඳින් ඉදුණු පසු වරකා හෝ වැල ලෙස පලතුරක් ආකාරයට කෑමට හෝ පලතුරු බීමක් ලෙස ද සකසා රසවිඳිය හැකිය.

ඉතින් මෙහි අවසාන අවස්ථාවලදී බොහෝ විට කොස් ඵලයේ බීජ අපට ලබා ගත හැකිය. ඒ වගේම කොස් ගස් යට ද, බිම වැටී ගිය ගෙඩිවලින් කොස් ඇට අපට එකතු කර ගත හැකිය. කොස් ඇට විවිධ ආකාරයට සකසා ආහාරයට ගත හැකිය. කවුරුත් කෑමට ඉතා රුචි වූ කලුපොල් මාලුව හදන්නෙත් කොස් ඇටවලිනි.

කොස් ඇටවලින් සෑදිය හැකි, වස විසෙන් තොර පෝෂදායක රස කැවිල්ලක් ලෙස කොස් ඇට ලඩ්ඩු නැත්නම් කොස් ඇට අග්ගලා ගත හැකිය. මේ ඇඳිරි නීතිය ඇති කාලයේ පහසුවෙන් ම සකසා ගත හැකි වගේම පවුලේ අය අතර රසවත් දෑ බෙදා ගැනීමේ සතුට ද ඔබට ලබා ගත හැකිය. එමෙන්ම හොඳ අරපිරිමැසුම් සහිතය.

අවශ්‍ය දෑ:
• කොස් ඇට 100ක් පමණ
• පොල් ගෙඩි බෑයක ගා ගත් පොල්
• ලුණු ස්වල්පයක්
• ඔබේ රසයේ හැටියට සීනි හෝ හකුරු
• තලා ගත් ගම්මිරිස් ඇට කිහිපයක්

මුලින් ම සෝදා වියලා පිරිසිදු කරගත් කොස් ඇට කබලක දමා පුලුස්සා ගන්න. ඒ සඳහා ඇලුමිනියම් වැනි තාච්චියක් ගෙන මද ගින්දරේ තබා රත් වූ පසු කොස් ඇට ටික දමා පොත්ත පුපුරන තුරු කොස් ඇට ටික හොඳින් බැද ගන්න. මෙසේ බැද ගන්නා විට කොස් ඇටය හොඳින් තැම්බීම සිදු විය යුතුය. ඒ නිසා ගින්දර වැඩි කර ගන්න එපා. අවශ්‍ය පමණට පිළිස්සී ගිය කොස් ඇට ගෙන එය නිවෙන්නට හරින්න.

ඒ අතරතුර අවශ්‍ය පොල් බෑයක ප්‍රමාණයේ පොල් ගා ගත හැකිය. ඒ වගේම ගම්මිරිස් ඇට ටික ද තරමක් කෑලි සිටින සේ තලා ගත හැකිය.

නිවුණු කොස් ඇට ගෙන එහි පොතු සියල්ලම ඉවත් කර ගන්න. පොත්ත පුපුරා ඇති නිසා පහසුවෙන් එය ඉවත් කර ගත හැකිය. මේ සඳහා තේ හැන්දක මිට පැත්ත ආධාර කර ගත හැකිය.

මෙසේ පිරිසිදු කරගත් කොස් ඇට ටික වංගෙඩියක දමා හොඳින් කොටා ගන්න ඕනි. මෙහි දී තරමක කෑලි තියෙන්න ඕනි. දැන් ඒ කොටා ගත් මිශ්‍රණයට පොල් ටිකකට ලුණු කළවම් කර මිශ්‍ර කරන්න. ඒ වගේම සීනි හෝ හකුරු ද එක් කරන්න. තලා ගත් ගම්මිරිස් ටික ද මිශ්‍ර කරන්න. දැන් නැවතත් හොඳින් කොටා මිශ්‍රණය වෙන භාජනයකට දමා ගන්න.

ඔබට අවශ්‍ය පරිදි ලඩ්ඩු ප්‍රමාණ කොට අතින් සාදා ගත හැකිය. මේ කොස් ඇට ප්‍රමාණයෙන් ලඩ්ඩු 15ක් 20ක් අතර ප්‍රමාණයක් සාදා ගත හැකිය. මෙසේ සාදා ගත් කොස් ඇට ලඩ්ඩු පවුලේ අය අතර බෙදා ගෙන රස විඳින්න. අන් අයට ද දන් දෙන්න. ලද අවස්ථාවක සංඝයාට ද පූජා කොට පින් රැස් කර ගන්න.

“දත්වා ච භුත්වා ච යථානුභාවං
අනින්දිතෝ සග්ගමුපේති ඨානං

තමාගේ ශක්ති පරිදි ප්‍රණීත දන් දී, ප්‍රණීත ආහාර තමාත් අනුභව කොට නින්දා රහිත සුගතියෙහි උපදී”

“මනාපදායී ලභතේ මනාපං

මනාප දේ දෙන්නා මනාප දේ ලබයි” යනු බුදු වදන් ය. ඒ අනුව බලන විට ආහාරයට ගැරහීම නුසුදුසු ය.

ඔබට ජය ශ්‍රී. සුභ දවසක්!
ඔබේ හිතාදර,
අෂාන් ඉමල්ක.

අසනීප වූ රෝගියෙකුට සුප් සාදා දීම සාමාන්‍ය කරුණකි. එහි ඇති රහස නම් කෑම අරුචියකින් තොරව ශරීරයට ශක්තිය ලබා ගත හැකි වීමයි. රෝගී තත්වයෙන් ඉක්මනින් නැඟි සිටීමට බෙහෙවින් එය උපකාරි වේ. විශේෂ මංගල උත්සව වල වගේ ම දානයක දී පවා දෙන ආහාර වේල රසවත් කර ගැනීමට සුප් එකතු කර ගැනීම බොහෝ දෙනෙකුගේ තේරීම වේ.

ඉතින් අද අපි කියා දෙන්න යන්නේ විශේෂ රසයකින් යුතු නැවත නැවත බොන්න හිතෙන සුප් එකක් සාදන්නයි. මෙහි නම “Tom Yum Soup” වේ. ප්‍රධාන කුළුබඩුව වන්නේ සේරය. vegetarian අයට වගේ ම ඕනෑම කෙනෙකුට මෙහි රස විඳින්න පුළුවන්. ඉතින් බලමු මේකට අවශ්‍ය ද්‍රව්‍ය මොනවාද කියලා.

පස් දෙනෙකුට පමණ සෑහෙන ප්‍රමාණ

■ සේර ගස් 2
■ ඉඟුරු තරමක කැබැල්ලක්
■ සුදු ලූනු බික් 4 ක් පමණ
■ වියළි මිරිස් කරල් 2
■ එළවළු තම්බා ගත් වතුර හෝ සුප් කැටයක් එක් කර සාදා ගත් වතුර කෝප්ප 5
■ දෙහි කොළ 5 පමණ
■ තක්කාලි ගෙඩි 1 පමණ
■ සෝයා සෝස් මේස හැඳි 2
■ දෙහි ගෙඩියක ඉස්ම
■ පොල්තෙල් මේස හැඳි 2
■ පොල්කිරි කෝප්ප 1
■ ලුණු
■ ගම්මිරිස් රස පදමට

මුලින් ම සේර ගස් දෙක ගෙන යට පැත්තෙ මුල කොටස ඉවත් කරගන්න. ඉන්පසු පිහියක් එම සේර ගස් මත තබා අතින් තද කර තලා ගන්න. තලා ගත් සේර ටික අඟල් 2 පමණ කෑලි වලට කපා ගන්න.

ඊලඟට කළ යුත්තේ වියළි මිරිස් කරල් දෙක ගෙන නැට්ට ඉවත් කර වතුරේ පෙඟවා ගැනීමයි. ඒ අතර ඉඟුරු කෑල්ල හා සුදු ලූනු ටික සුද්ද කර ගන්න. වංගෙඩිය ගෙන පොඟවා ගත් මිරිස් කරල් ද , සුදු ලූනු හා ඉඟුරු ද දමා හොඳට කොටා ගන්න. කොටා ගත් මිශ්‍රණය වංගෙඩියෙන් ඉවත් කර භාජනයකට දමා ගන්න. වංගෙඩිය සෝදා මිශ්‍රණයේ ඉතිරි ඉස්ම ටිකත් භාජනයට ම දාගන්න.

ඔබ vegetarian නම් මේ සඳහා එළවළු තම්බා ගත් වතුර ගත හැකිය. එසේ නොවන අයට chicken හෝ sea food යොදා ගත හැකිය. සුප් එකට දැමීමට පෙර chicken හෝ sea food තැම්බූ වතුර සුප් එකට දැමීමට ගත හැකිය. මේ සඳහා සුප් කැටයක් දිය කර සාදා ගත් ජලය ද භාවිතා කළ හැක. මෙවැනි තැම්බූ වතුර කෝප්ප පහක් සාදාගන්න.

තක්කාලි ගෙඩිය ද සෝදා කොටු ආකාරයට කපාගන්න. vegetarian විදිහට හදනවා නම් ටෝෆු 100ට හෝ අල 100ට පමණ දැමිය හැකිය. ඒ වගේ ම Button mushroom ද කොටු ආකාරයට කපා දැමිය හැක. chicken යොදා ගන්නේ නම් කටු කොටස ඉවත් කර මස් පමණක් සුප් එකට දමන්න. sea food ද අවශ්‍ය ආකාරයට රුචිකත්වය අනුව දැමිය හැක. මේ සඳහා වඩාත් රසවත් වන්නේ ඉස්සෝ හා දැල්ලො යොදා ගන්නේ නම් ය. මෙසේ සකසා ගත් ද්‍රව්‍ය ටික පසෙකින් තබන්න.

සුප් සෑදීම සඳහා ගැඹුර ඇති භාජනයක් ගෙන ලිප මත තබා ලිප දල්වා අඩු ගින්දරේ තබන්න. භාජනය රත් වූ පසු පොල්තෙල් මේස හැඳි දෙක දමන්න. තෙල් රත් වූ පසු සේර ටික දමන්න. ටිකක් තෙලෙන් බැදෙන්න අරින්න. හොඳ ප්‍රසන්න සුවඳක් දැනේවි ඔබට.

ඊළඟට වංගෙඩියේ දමා කොටා සකසා ගත් මිශ්‍රණය දමන්න. එය ද මද වේලාවක් තෙලෙන් බැඳ ගන්න. එසේ තෙම්පරාදු වූ පසු ඔබ සකසා ගත් තැම්බුම් වතුර කෝප්ප පහ දමන්න. හොඳින් මිශ්‍ර කරන්න.

ගින්දර ටිකක් වැඩි කරන්න මිශ්‍රණය නටන තුරු. මෙසේ මිශ්‍රණය උතුරන විට දෙහි කොළ ටික දමන්න. තක්කාලි ටික ද දමන්න. සෝයා සෝස් මේස හැඳි දෙක ද දමන්න. මිශ්‍ර කරමින් රුචිකත්වය අනුව chicken, sea food හෝ එළවළු එක් කරගන්න. හොඳින් තැම්බෙන්නට ඉඩ අරින්න. ගම්මිරිස් කුඩු හා ලුණු අවශ්‍ය පරිදි එක්කර ගන්න.

මිශ්‍රණය විනාඩි 10 ක් පමණ හොඳින් තැම්බූ පසු ගින්දර අඩු කර පොල්කිරි කෝප්පය දමන්න. මිටිකිරි ම හෝ මිටිකිරි, දියකිරි මිශ්‍ර කර දැමිය හැක. උතුරන තෙක් හැඳි ගාන්න. ඉතිරූ පසු ලිප නිවා දමා දෙහි ගෙඩියක ඉස්ම එක් කරන්න. අවශ්‍ය පරිදි ලුණු ගම්මිරිස් පදම බලා ඔබේ රසට සකසා ගන්න. මදක් නිවුණු පසු මේ සුප් එකේ රස විඳලා බලන්න. අන් අයටත් සාදා රස විඳින්න දෙන්න.

සංඝ දානයක දී දහවල දානය සඳහා වඩාත් සුදුසු වේ. දන් වැළඳීමට පෙර පූජා කරන්නේ නම් ඉතා අගනේ ය.

“දත්වා ච භුත්වා ච යථානුභාවං
අනින්දිතෝ සග්ගමුපේති ඨානං

තමාගේ ශක්ති පරිදි ප්‍රණීත දන් දී, ප්‍රණීත ආහාර තමාත් අනුභව කොට නින්දා රහිත සුගතියෙහි උපදී”

“මනාපදායී ලභතේ මනාපං”

“මනාප දේ දෙන්නා මනාප දේ ලබයි” යනු බුදු වදන් ය. ඒ අනුව බලන විට ආහාරයට ගැරහීම නුසුදුසු ය.”

ඔබට ජය ශ්‍රී. සුභ දවසක්!

ඔබේ හිතාදර – අෂාන් ඉමල්ක

අල හොදි, අල චිප්ස් මෙන්ම අල බැදුම ද බහුලව දැකිය හැකි ආහාර වේ. එසේ ම කට්ලට් වැනි ආහාරවල මැද පිරවුම රසවත් කරගැනීමට ද යොදාගනී. ලංකාවේ විවිධ ප්‍රදේශවල අර්තාපල් විවිධ රසයට සාදනු ලබයි. ඒ ඒ ප්‍රදේශවලට ම ආවේණික වූ අල තෙල් දැමීම, ව්‍යංජන වර්ග සෑදීම, බිස්ටේක් දැමීම ආදිය දැකිය හැකිය.

ඉතින් අද අපි කියා දෙන්නේ බොහෝ දෙනෙකුට ලෙහෙසියෙන් මෙන්ම අලුත් ම රසයකින් අල බැදුමක් සාදා ගන්නා ආකාරය යි. උතුරු ඉන්දියානු ජාතිකයන් චපාති කෑමට බොහෝ විට සාදන්නේ මේ අල බැදුම ය. ආප්ප, රොටී වගේම පාන් සමග වුවත් මේ අල බැදුම නම් කෙනෙකුට අගේට රස විඳිය හැක. අලවල පිෂ්ඨය අධික ය. මේ නිසා දියවැඩියා රෝගී තත්වයෙන් පෙලෙන කෙනෙකු නම් පරිස්සමින් ආහාරයට ගත යුතු වේ.

හය දෙනෙකුට ප්‍රමාණවත් අල බැදුමක් සඳහා අවශ්‍ය දෑ :-

■ ලොකු අල ගෙඩි 5
■ රටළුෑණු ගෙඩි 4
■ රම්පේ / කරපිංචා ඉත්තක්
■ අමු මිරිස් කරල් 2
■ කුරුඳු පොත්තක්
■ සූදුරු තේ හැඳි 3
■ අබ තේ හැඳි 1
■ මිරිස් කුඩු තේ හැඳි 2
■ අමු තුනපහ කුඩු තේ හැඳි 3
■ ගම්මිරිස් තේ හැඳි ½
■ ලුණු තේ හැඳි 4
■ ගිතෙල් හෝ පොල්තෙල් මේස හැඳි 4 ක් පමණ
■ කොත්තමල්ලි කොළ මිටක් ද තිබුණොත් ඉතා හොඳය.

පළමුව අප කළ යුත්තේ අර්තාපල් ගෙඩි ටික පොතු ඉවත් කරගැනීම යි. ඉන් පසු අල ගෙඩිය අල චිප්ස් සඳහා කපන ආකාරයට දිගට කපා ගන්න. මෙහිදී මුලින් ම අවශ්‍ය ඝනකම පරිදි දිග අතට අල පෙති කපාගෙන ඉන්පසු කොටු හැඩය එන පරිදි අල පෙති කපා ගන්න. කපාගන්නා අල තීරු වතුර දැමූ භාජනයකට දමන්න. එවිට කහට ගතිය නොපිපේ.

දෙවනුව රටළුෑණු ගෙඩි ටික පොතු ඇර සාමාන්‍ය පරිදි කපාගන්න. කලින් කැපූ අල තීරු වතුර ටික පෙරා වෙනත් බඳුනකට දමාගන්න. එසේ දමාගත් බඳුනට කපාගත් රටළුෑණු ටික ද දමන්න.

දැන් එම බඳුනට ම මිරිස් කුඩු, ගම්මිරිස් කුඩු, අමු තුනපහ කුඩු හා කුරුඳු පොත්තක් ද දමා හොඳින් කලවම් කරගන්න. ඔබේ රස පරිදි මිරිස් කුඩු හා තුනපහ කුඩු අඩු වැඩි කරගත හැක. දැන් එය පසෙකින් තබන්න.

සාස්පානක් හෝ තාච්චියක් ගෙන ලිප මත තබා රත් කරගන්න. තාච්චිය රත්වන විට ගිතෙල් ටික දමන්න. ඔබ ගිතෙල් රසට කැමති නැතිනම් පොල්තෙල් දමන්න. තෙල් ටික රත් වූ පසු මුලින් ම සූදුරු තෙලට දමන්න. වැඩිය කර කරගන්නේ නැතුව ගින්දර ටිකක් අඩු කරගන්න. එයට ම අබ ටිකත් දමන්න. අබ ඇට එක දෙක පුපුරන විට රම්පේ හා කරපිංචා එක් කරන්න. කපාගත් අමුමිරිස් කරල් ද ඒ තෙලට ම දමන්න.

රත් වූ බඳුනේ ඇති මිශ්‍රණයට අපි කලින් සකසා ගත් අල තීරු මිශ්‍ර කරගන්න. හොඳින් කලවම් කරන්න. ගින්දර මධ්‍යම ප්‍රමාණයේ තබාගැනීම හොඳ ය. අඩිය අල්ලන ගතියක් ඒනම් ගින්දර තවත් අඩු කළ යුතුය. දැන් එය කර මූඩියකින් හෝ පියනකින් වසා ගන්න.
විටින් විට මිශ්‍ර කරමින් කලවම් කරගන්න. මඳක් අල තැම්බීගෙන එද්දී ලුණු කුඩු ටික මිශ්‍ර කරන්න. අලවල තිබෙන වතුරින් ම අල ටික තැම්බේ. ඒ වගේම තෙලෙන් හොඳට ෆ්‍රයි වේ. අල ටික ෆ්‍රයි වෙනකොට සූදුරු සුවඳ මිශ්‍ර ඉතා මිහිරි සුවඳක් දැනේවි. අපි කපාගත් අල තීරු තැම්බෙන විට හා මිශ්‍ර කරන විට කුඩා ප්‍රමාණයට කැඩේ. නමුත් පමණට වඩා මිශ්‍ර කර අල ටික දියකරගන්න එපා. එවිට එහි ලස්සන නැති වේ.

මෙසේ අල මිශ්‍රණයේ වතුර ටික නැති වී හොඳට මැලවී ගිය පසු ලිප නිවා දමන්න. ඔබ කොත්තමල්ලි කොළවලට කැමති නම් මිටක් පමණ ගෙන විශාල කෑලි සේ කපා උඩින් ඉසින්න. මඳ වේලාවකින් මිශ්‍ර කරන්න. ඔබට දැන් ඉන්දියානු රසයට රසවත් අල බැදුමක රස විඳිය හැක. ඔබේ පවුලේ අයටත් සාදා දෙන්න. අවස්ථාව ලද විට සංඝයා උදෙසා පූජා කොට පින් රැස් කරගන්න. හීල දානයට පූජා කරගන්නේ නම් වඩාත් උචිත වේ.

“දත්වා ච භුත්වා ච යථානුභාවං
අනින්දිතෝ සග්ගමුපේති ඨානං

තමාගේ ශක්ති පරිදි ප්‍රණීත දන් දී, ප්‍රණීත ආහාර තමාත් අනුභව කොට නින්දා රහිත සුගතියෙහි උපදී”

“මනාපදායී ලභතේ මනාපං

මනාප දේ දෙන්නා මනාප දේ ලබයි” යනු බුදු වදන් ය. ඒ අනුව බලන විට ආහාරයට ගැරහීම නුසුදුසු ය.

ඔබට ජය ශ්‍රී. සුභ දවසක්!

ඔබේ හිතාදර

අෂාන් ඉමල්ක